Србија ја зголеми минималната плата

Минималната цена на работен час во Србија од 1 јануари 2023 година ќе биде 230 динари (1,96 евра), а минималната плата 40.020 динари (341 евро), изјави министерот за финансии Синиша Мали по седницата на Социјално-економскиот совет (СЕС).

Со ова платата се зголемува за околу 14 проценти. Минималната цена на работен час досега беше 201 динари, а минималната плата околу 35 илјади динари, односно околу 300 евра.

Мали рече дека зголемувањето на минималната плата ќе доведе до годишно зголемување на деловните трошоци за 350 милиони евра, но оти државата ќе покрие дел од трошокот за да нема отпуштања.

Синдикатите бараа минималната плата да се зголеми на 366 евра, затоа што инфлацијата веќе го „изела“ покачувањето.