Србија ги отвора трговските центри во понеделник

На денешната седница на Кризниот штаб донесена е одлука за отворање на трговските центри, но и за враќање на учениците во училиштата.

Од понеделник, 12 април, трговските центри се отвораат и нивното работно време ќе биде до 22 часот. Сепак, угостителските објекти во трговските центри сè уште нема да бидат отворени, одлучи Кризниот штаб. Попрецизно, угостителски објекти што се наоѓаат во трговски центри со тераса и пристап до отворено ќе може да работат, а тие што се во затворен простор ќе останат затворени.

Кога станува збор за учениците, одлуката е условена со уште една проверка на епидемиолошката ситуација, така што доколку бројките се намалуваат, децата ќе се вратат на училиште од 19 април. Тоа практично значи настава во училниците, но и комбинирана настава, каков што беше случајот со средношколците.

На денешната седница на Кризниот штаб се дискутирало и за отворање на внатрешните делови на угостителските објекти. Според планот, тие треба да бидат отворени на 19 април, но сепак, одлуката е одложена.