„Подравка“ во првиот квартал забележа значителен пораст на приходите

Групацијата „Подравка“ и во 2024 година ќе продолжи со позитивниот тренд на зголемување на резултатите и профитабилноста. Во првите три месеци од годинава приходите од продажба изнесуваат 191,8 милиони евра, што е за 15,9 милиони евра или за 9,1% повеќе во однос на првиот квартал од минатата година.

Приходите на сегментот храна изнесуваат 146,5 милиони евра и се повисоки за 14,8 милиони евра или 11,3% во однос на истиот период од 2023 година. Порастот на храната е забележан во речиси сите региони. Зголемување на приходите од продажба е забележано и во сегментот фармацевтски производи. Споредено со првиот квартал од 2023 година, тие пораснале за 2,5%, што е за 1,1 милион евра повеќе, односно вкупниот износ од 45,3 милиони евра.

Нето-добивката на групацијата „Подравка“ во првиот квартал од 2024 година изнесува 23,5 милиони евра, што е за 7,8 милиони евра или 49,7% повеќе во однос на истиот период лани. Во исто време, нето-добивката на прехрана порасна речиси двојно во однос на првите три месеци од 2023 година, за 95%, и изнесува 14,5 милиони евра. Оперативната добивка на групацијата пред амортизација (EBITDA) во првиот квартал од 2024 година достигна 37,9 милиони евра, што е за 10,6 милиони евра повеќе отколку во првите три месеци од 2023 година.

Ваквиот силен пораст на приходите од продажба покажува дека нашиот фокус на зајакнување на продажбата, зголемување на бројот на клиенти и профитабилноста и препознатливоста на производното портфолио на извозните пазари дава добри и јасно видливи резултати. Тоа се рефлектира врз зголемувањето на количината на продадени стоки и во порастот на профитабилноста. Сметам дека силниот раст на продажбата е најдобрата награда за многубројните, а често и многу тешки промени што ги имплементиравме во сегментот храна во изминатиот период, изјави Мартина Далиќ, претседател на Управниот одбор на „Подравка“.