Во Белград ќе се одржи вториот меѓународен саем „Винска визија на отворениот Балкан“

Под покровителство на владите на Србија, Македонија и Албанија, а како дел од иницијативата Отворен Балкан, од 16 до 19 ноември во Белград ќе се одржи вториот меѓународен саем за вино „Винска визија на отворениот Балкан“. На саемот ќе се промовираат винските патишта на Балканот и ќе се соберат најдобрите производители на вино во регионот и пошироко.

Минатата година  „Винска визија на отворениот Балкан“ привлече над 30.000 посетители, љубители на вино и вински професионалци, презентираше повеќе од 350 винарии од регионот, промовирајќи ја богатата винска култура и воспоставувајќи вредни деловни контакти.

За помалку од една година „Винската Визија на Отворениот Балкан“ имаше импресивни настапи на меѓународно ниво на водечките вински саеми како што се „Провејн“ во Дизелдорф и „ВинИтали“ во Верона. 

За Саемот 2023 подготвивме програма која има за цел подобро да ги позиционира вината од регионот на светскиот пазар. Приоритет на „Винската Визија на Отворениот Балкан“ е да пласира што повеќе регионални винарии и затоа овогодинешниот саем ќе биде домаќин на уште поголем број професионални посетители, дистрибутери, вински новинари и експерти од целиот свет, најавија организаторите. 

Саемот ќе има изложбено-продажен карактер, а ќе биде поделен на тематски зони каде ќе бидат претставени автентични вина и автохтони сорти од Западен Балкан и врвни вина од реномирани винарски региони ширум светот. Првиот ден ќе биде резервиран исклучиво за професионални посетители, со презентации и B2B работилници. Излагачите ќе имаат посебни услови, вклучително и субвенционирани цени на изложбениот простор. Форматот на саемот ќе им овозможи на потенцијалните потрошувачи да ги купат прикажаните производи, давајќи можност да развијат деловни контакти и да воспостават нови деловни врски. Штандовите ќе бидат приспособени на потребите на винариите, со маси за дегустација на вино, витрини за чаши, украсни аранжмани на шишиња за вино, како и простор за дегустации на вино. Опциите за штандови вклучуваат мали (16 m²), средни (32 m²) и големи (64 m²).

Крајниот рок за пријавување на излагачите е 19 јуни, а рокот за потврда на регистрација е 10 јули 2023 година. 

За повеќе детали за тоа како да аплицирате, посетете ја https://fair.openbalkan.com/