Билјана Костов Жежовска: Колички и кошници

Иницијален фактор за задоволството на потрошувачите

Автор: М-р Билјана Костов Жежовска, извршен директор на „Маркето Солутионс"

Факт е дека, во зависност од потребите и навиките, постојат различни профили на потрошувачи кои пазаруваат во супермаркетите. Едни влегуваат за големо периодично пазарење, други, пак, влегуваат за два/три продукта, трети за два/три продукта, но излегуваат со повеќе, додека четврти влегуваат само од љубопитност итн. Токму во ова издание сакам да потенцирам дека за секој тип купувач потребна е соодветна погодност при пазарење доколку супермаркетот се стреми да биде позициониран како најдобро место за пазарење.

Кога велам погодности за пазарење мислам на количките и кошниците за шопинг што се иницијални во светот на секојдневното пазарување. Шопинг-количките ги има во најразлични форми и димензии, почнувајќи од мали и функционални до големи и габаритни колички за поголема намена. Во последните години сè позастапена е новата генерација на шопинг-колички, целосно изработени од пластика достапни во најразлични дизајни и бои. Во светски рамки, истражувањата докажуваат дека овој тип шопинг-колички се користат на места каде што има екстремни климатски услови со многу дожд, снег и влага, каде што металните колички страдаат од оксидација. Поради не’рѓосувачкото својство, векот на овие колички е трипати подолг, отколку на металните колички. Освен тоа, оваа генерација на шопинг-колички има и други придобивки: уникатен дизајн, различни бои, лесни се за управување, бесшумни, нивното одржување е намалено, пластиката се рециклира итн. Слично како и количките, така и кошниците денес се достапни со најразлични дизајни и големини, согласно потребите на потрошувачите. Сè почести се подвижните кошници со телескопска рачка, што се попрактични во споредба со рачните кошници во поглед на носивоста на тежината кај купувачите.