Билјана Костов Жежовска: Цената – импулс за купување

Во минатиот текст говорев за рафтот и за неговата правилна подреденост, каде што ги споменав профилите за цени како иницијален додаток во малопродажното место. Главен фокус во овој број ќе бидат професионалните решенијата за истакнување на цените, како и на другите вредности на производите.

Која е примената на решенијата за етикетирање?

Сведоци сме дека во продажните места на секаков начин се застапени етикетите и дека без нив пазарењето би било незамисливо. Етикетите се концизно објаснување за производите. Етикетите се познати како метод за разлика што му помага на потрошувачот да препознае еден производ од друг. Едноставно кажано, етикетите се видливи носители на информации и директно средство за размена на информации за производот помеѓу потрошувачите и продавачите.

Потребата од етикети е широка и корисна за производи од секаков тип, но кога зборуваме за користењето етикети во маркетите ги земаме предвид алатките за рачно етикетирање со кои се постигнуваат одредени предности.

Обележувањето цени со помош на алатките за рачно етикетирање се прави на брз и флексибилен начин. Тоа значи дека овие решенија ја олеснуваат работата на продажниот персонал и ги заменуваат сите „квазирешенија" за рачно испишување со професионално обележување на цените. Често ги сретнуваме овие етикети на производите во помалите маркети или, пак, на места каде што производите се слободно изложени со цел потрошувачот веднаш да ја увиди бараната цена. Од аспект на потрошувачот задоволството расте бидејќи бараната информација ја има „во рака".