Билјана Костов Жежовска : Рафтот – тивок продавач во супермаркетот

 

Рафтот во продажното место се издвојува како важен медиум од причина што тој претставува иницијална точка на контакт помеѓу производот и потрошувачот. Не смее да се изостави фактот дека околу 70% од потрошувачите одлуката за купување ја прават во моментот на пазарење најчесто пред рафтот. Во овој контекст изложеноста или поставеноста на производот на рафтот има водечки ефект врз одлуката на потрошувачот дали да го купи производот или не. Во продажните места од типот на супермаркети, каде што потрошувачите сами се послужуваат единствен продавач е рафтот, па затоа организацијата на рафтот и поставеноста на производите директно влијаат на потрошувачката, односно на профитот. Од друга страна, пак, овие фактори директно влијаат врз задоволството на потрошувачот, на купувачката одлука и на come back стратегијата.

 

 

Колку често во супермаркет наидувате производите на рафтот да се измешани? На пример, да земеме производ што е поставен во повеќе различни вкусови, бои, шифри или слични карактеристики, пакувањето е речиси идентично, разликата е минимална, што би се рекло речиси незабележлива на прв поглед. Сигурно посветувате особено внимание, бидејќи може многу лесно да погрешите во изборот и да заминете со погрешен производ. Постои уште една веројатност што ве принудува да пребарувате меѓу рафтот за да посегнете до бараниот производ. Суштината на овој проблем лежи во подреденоста на рафтот, односно во секциите што се предвидени на рафтот.