Нови предизвици за европскиот пазар на храна

Продажбата на приватни марки достигна рекордни бројки, додека трендовите за здравје и кето-диета го обликуваат европскиот пазар на храна...

Извор: ПЛМА

Продажбата на приватни марки достигна 352 милијарди евра

Трговските бендови продолжуваат да го прошируваат присуството на пазарот во Европа со вкупна продажба што достигна 352 милијарди евра во 2024 година, покажуваат податоците на „Нилсен IQ“.

Тоа претставува пораст од 0,11 процентни поени во пазарниот удел во споредба со 2023 година. Со тоа приватните трговски марки достигнаа до удел од 38,1% во вкупниот сектор за прехранбени производи. Вкупниот пазар за прехранбени производи (приватни трговски марки и брендови на производители) изнесува 924 милијарди евра – речиси 100 милијарди повеќе отколку во 2022 година.

„Нилсен IQ“ спроведе истражување на 17 европски пазари за ажурирање на Меѓународното годишно издание на приватни марки на ПЛМА, при што забележа пораст на трговските брендови во 9 од 17. анализирани земји.

Европа останува доминантен глобален играч на пазарот на приватни марки, со 10 земји што го надминуваат пазарниот удел од 30% и пет што надминуваат 40%. Трите најголеми пазари за прехранбени производи во регионот – Германија, Обединетото Кралство и Франција – имаат вкупен удел на трговски марки од 39,7%, што претставува зголемување од 0,1 процентни поени во споредба со претходната година.

Меѓу најбрзорастечките пазари Шпанија води со зголемување од 1,2 процентни поени на уделот на трговските марки, по која следуваат Чешка (0,5), Португалија (0,4) и Франција (0,4). Швајцарија останува најсилниот пазар за трговските брендови, со удел од 52%, што ја прави единствената земја со удел поголем од 50%.

Развој на здравствени прехранбени трговски марки

Почетокот на 2025 година донесе повеќе лансирања на приватни трговски марки на храна и пијалаци, кои одговараат на потребата на потрошувачите да гледаат на овие производи како на здрави.

Купувачите од сите возрасти внимателно ги анализираат нутриентите на производите за да видат дали го содржат тоа што им е потребно. Овој тренд ја носи храната што порано се нарекуваше „здрава“ на сосема ново ниво.

Трендот е поврзан и со појавата на лекови за губење на тежината во општества што сѐ повеќе страдаат од дебелина. Овие лекови им го привлекуваат вниманието и на потрошувачите што се фокусирани на протеини, влакна, витамини и минерали во храната, нутриенти што им се препорачуваат. Трендот вклучува и производи за здравјето на дигестивниот систем, како и храна и пијалаци што промовираат подобар сон.

Другата област во која се појавува концептот на храна како медицина е менталното здравје и емоционалната благосостојба. Станува збор за намирници што го подобруваат расположението, го заоструваат фокусот и решаваат други психолошки проблеми.

Очекувањата се дека храната и пијалаците ќе играат сѐ поголема улога во управувањето со менталното здравје, рушејќи ги социјалните стигми што се поврзани со здравствените проблеми за кои малку се зборува. Помладите генерации се предводници во трендот за поддршка и подобрување на менталното здравје.

Кето-диетата станува сè попопуларна

Новите податоци на „Еуромонитор“ покажуваат континуиран пораст на кето-диетата меѓу европските потрошувачи.

Последната анкета открива зголемување на бројот на луѓе што се придржуваат на оваа диета, со процент што се зголемил од 3,2 на 3,4%. Овој тренд на пораст е присутен на клучните пазари, вклучувајќи ги Обединетото Кралство (од 1,8 на 2%), Франција (од 1,9 на 2,3%), Германија (од 1,2 на 2,3%) и Италија (од 1,5 на 2,3%).

Порастот е поддржан од однесувањето на потрошувачите, кои се фокусирани на поздрав избор, без да прават компромис со задоволството. Концептот „здраво уживање“, според кој луѓето бараат хранливи опции без да го жртвуваат вкусот или ситоста, е важен фактор за зголемената популарност на кето-диетата.

Овој тренд претставува значајна можност за бизнисите во индустријата за храна и пијалаци. Потрошувачите бараат производи што ги регулираат тежината и севкупното здравје, без да се жртвува уживачката страна при јадењето. Кето-производите, кои ветуваат ефективна контрола на тежината и видливи здравствени придобивки, се добро позиционирани да ги искористат барањата на овој пазар во развој.

„Карфур“ ќе отвора продавници на 150 железнички станици

„Карфур“ ја доби тендерската постапка на француската национална железничка компанија СНЦФ за отворање 30 продавници годишно на сите француски железнички станици во следните пет години.

Според трговските експерти, и конкурентот „Монопри“ имал интерес за оваа постапка, а извршниот директор на „Карфур“, Александре Бомпар, изразил големо задоволство што ја освоиле оваа долга и сложена тендерска постапка. Тој очекува зголемена видливост и голема фреквенција на овие посетени локации.

Според „Нилсен IQ“, профитот по квадратен метар на станици што имаат повеќе од 5 милиони патници годишно достигнува 9.581 евра, речиси 40% повеќе од традиционалните продавници во соседството (6.852 евра по м²).

Продавниците ќе бидат отворени под три различни банери на „Карфур“. Најголемиот дел од нив ќе бидат „Карфур експрес“, со големина од 80 до 400 м² и со висок удел на сопствени трговски марки (40%), свежи производи и грицки. Вториот формат ќе биде „Потажер сити“, кој Карфур го лансира пред две години. Овој банер е фокусиран на овошје и зеленчук, кои сочинуваат од 60 и 65% од приходите, со понуда од 500 до 600 артикли. Дел од продавниците на помалите железнички станици ќе бидат самоуслужни минимаркети, од форматот „Апи“. Овие продавници немаат персонал, а потрошувачите можат да влезат во нив со користење QR-код.

Накратко...

• „Дешпар“ ја воведе новата линија S-Budget на пазарот во Италија. Линијата е наменета за купувачи што бараат заштеда без компромис со квалитетот, кој е загарантиран со строгите контроли применети во целиот снабдувачки синџир, од изборот на суровини до нивната преработка, пакување и дистрибуција.
• „Ахолд Делез“ воведе 500 нови приватни трговски марки во Централна и во Југоисточна Европа. Продуктите се достапни веќе во „Алберт“ во Чешка, „Мега имиџ“ во Романија, „Алфа бета“ во Грција и во „Макси“ во Србија.
• „Едека“ привлекува практиканти со нова кампања на „Тик-ток“ и на „Инстаграм“. Компанијата цели специфично да се обрати до генерацијата Z и хумористично ги адресира актуелните трендови.
• „Меркадона“ ќе инвестира 250 милиони евра во новиот стратешки дигитален план за периодот 2025-2028, со кој ќе настојува технолошки да ги поедностави внатрешните бизнис-процеси во канцелариите, логистиката и во физичките продавници.
• „Сеинсберис“ планира реорганизација на одделите за убавина, вклучувајќи воведување нова трговска марка. Продавницата регистрирала неколку линии The Edit Sainsbury’s и Sainsbury’s The Edit во Канцеларијата за интелектуална сопственост.
• „Пан Панорама“ забележа пораст од 2% на сопствената приватна марка во 2024 година со 11 линии и 3.200 производи. Целта е да достигне 3.600 артикли до 2025 година и да го зголеми уделот на приватните марки на 30% до 2026 година.
• „Шпар“ ги воведе диверзитетот и трендовите на азиската кујна во продавниците во Австрија со воведување на новиот трговски бренд Taste of Asia. Новата приватна марка ги обединува постојните азиски производи во нов дизајн. Освен тоа, линијата воведува и голем број нови, возбудливи производи.
• „Лидл“ објави дека по една година од лансирањето на P'tits prix oui, линијата се зголемила од почетните 100 на повеќе од 300 производи.
• „Алкампо“ ја заврши 2024 година со донација на прехранбени производи во вредност од 1,69 милиони евра за банките за храна и за други социјални ентитети. Оваа сума е еднаква на повеќе од 906.000 донирани производи, погодни за консумација, но не и за продажба.
• „Теско“ напредува во скратување на времето за достава во текот на истиот ден, со што станува водечки трговец на британскиот пазар. Купувачите што ќе резервираат термин пред 8:45 часот, можат да изберат термини за домашна достава во 13 часот и термини за подигнување на производите во 12 часот. Претходно, најраниот термин за истиот ден на достава беше во 19 часот, а за подигнување на производите во 16 часот.

Фото: Pexels