Анализи

Што сакаат потрошувачите и зошто – сега и во иднина

10 мај 2023

Трендовите и пазарот се менуваат од ден на ден. Поради тоа, особено е важно да се биде во тек со новитетите и да се слушаат потребите на потрошувачите. Ви презентираме преглед на најголемите трендови и прогнози за 2023 година, на кои компаниите ќе треба да обрнат внимание

Автори: Дејна Маке, раководител на „Минтел трендс“ за Америка; Метју Краб раководител на „Минтел трендс“ за Азија и Пацифик; Сајмон Мориарти раководител на „Минтел трендс“ за ЕМЕА

Свртеност кон себеси

Во последните две години потрошувачите беа повеќе фокусирани на заедницата, ставајќи ги сопствените потреби во втор план – приоритетот беше на јавното здравје и на безбедноста. Откако ја надминаа пандемијата, луѓето станаа желни повторно да се фокусираат на себеси, а брендовите може да им помогнат насочувајќи го централното внимание на нив во следните години.

Идентитетот се гради врз основа на секојдневните рутини и навики што се собираат низ годините. Пандемијата наруши голем дел од овие рутини, отворајќи им на луѓето можност да се редефинираат кои се. Брендовите ја препознаваат растечката потреба на луѓето да ја зацврстат и прослават сопствената индивидуалност. Тие одговараат со нови можности за експериментирање и самоистражување. Потрошувачите можеби сакаат да се истакнат, но не и да се вклопат во толпата, а можеби не знаат како тоа да го направат. Потенцирајќи ги интересите што потрошувачите ги прават единствени, брендовите можат да им помогнат да добијат сигурност при експериментирањето со нешто ново или дури и да им помогнат да се преиспитаат кои се. Потрошувачите се подготвени да ја зголемат самодовербата и во таа насока, брендовите тоа можат да им го понудат во облик на нови искуства или производи што ќе ја заскокоткаат нивната љубопитност.

Општоприфатената констатација „купувачот секогаш е во право“ еволуира во модел, во кој потрошувачите инвестираат, кокреираат и гласаат за промени заедно со брендовите.

Додека потрошувачите настојуваат да изградат нови делови од сопствениот идентитет, брендовите може да им помогнат да ги пополнат празнините со понуди што ќе ги развијат нивните вештини и ќе ги усовршуваат во нови области. Потрошувачите трагаат по нови начини за да станат поотпорни на промените додека се подготвуваат за неизвесната иднина. Со оглед на тоа што потрошувачите сакаат да ги разберат сопствените слаби точки и активно работат на нивно совладување, побарувачката на производи насочени кон менталното здравје и благосостојбата ќе се зголемува. Брендовите може да се позанимаваат со оваа желба за извесна иднина со допир на духовната страна и моралните убедувања на потрошувачите.

Потрошувачите се подготвени да ја зголемат самодовербата и во таа насока, брендовите тоа можат да им го понудат во облик на нови искуства или производи што ќе ја заскокоткаат нивната љубопитност.

Откако потрошувачите веќе ја запознаа виртуелната технологија, тие сакаат да контролираат кои нивни лични аспекти ќе бидат споделени на тие дигитални простори. Тие ќе го користат метаверзумот и ќе настојуваат да развијат уникатен идентитет што ќе одговара на нивната дигитална средина. Тоа ќе резултира со фрагментирани идентитети, односно потрошувачите во интернет-просторот ќе градат и изразуваат различни делови од себе, во зависност од платформата или контекстот. Тоа ќе доведе до посилно истакнување на приватноста на податоците и заштита на потрошувачите, бидејќи дигиталните отпечатоци стануваат поцврсти и послојни.

Моќта е во потрошувачите

Брендовите мора да направат ново место за потрошувачите во највисоките нивоа на својата агенда. Дури тие можат и да се повлечат и да им дозволат на потрошувачите да бидат креативен центар на иновациите. Оваа идеја оди подалеку од општоприфатената констатација „купувачот секогаш е во право“ и еволуира во модел, во кој потрошувачите инвестираат, кокреираат и гласаат за промени заедно со брендовите. Соодветниот одговор на овој тренд бара од брендовите да ги анализираат потребите на пазарот „надвор од кутијата“ и да се подготвени да преземат итна акција за иновации на пазарот.

Компаниите се подготвуваат на новиот модел на потрошувачот како кокреатор. Популарните социјални медиуми (на пример, „Тик-ток“) приоритет му даваат на самоизразувањето, поттикнувајќи ги потрошувачите да ја покажат и развиваат сопствената креативност од аспект на убавината, домот и храната. За да ја покажат својата преданост кон соработката, многу брендови ги истакнуваат креативните позиции во својата организација, кои често (макар и симболично) ги пренесуваат преку славни личности, инфлуенсери, деца или преку секојдневните корисници на производите/услугите. Брендовите можат да ги поттикнат потрошувачите да бидат креативен центар за иновации, истакнувајќи дека новите производи и услуги се резултат на повратни информации од корисниците. Компаниите може да ги искористат социјалните платформи за интеракција со корисниците и да собираат информации за тоа како нивните производи се користат, перципираат и што за нив се зборува.

Потрагата по практични опции и интерактивните искуства ќе продолжат да се развиваат, што значи дека технологијата ќе продолжи да има витална и влијателна улога во искуството на потрошувачот.

Во следните пет години брендовите сè повеќе ќе се занимаваат со ниша-идентитетите на лојалните потрошувачи – големите брендови ќе се фрагментираат во најразлични варијанти, со што ќе таргетираат директно во целта. Ќе се појави нова ера на социјално сигнализирање за потрошувачите, бидејќи тие се чувствуваат поинтегрирани со етиката на брендовите во кои инвестирале. Тоа што луѓето го носат, јадат и и возат не само што ќе го сигнализира статусот, туку ќе биде детално прикажување на нивните ставови и верувања. Напредокот на технологијата кој овозможува екстремна персонализација во сите категории, ќе остави помалку простор за масовни производи.

Прекумерен замор

Влегувајќи од криза во криза, потрошувачите се растргнати на повеќе страни, а истовремено се бомбардирани со безброј медиумски приказни и дигитални содржини. Пандемијата, зголемените трошоци за живот, енергетската криза, геополитичките немири и климатската криза си го наплатија данокот од потрошувачите и ќе продолжат да го прават тоа, предизвикувајќи замор и чувство на преоптоварување.

Пандемијата различно влијаеше и продолжува да влијае врз потрошувачите, предизвикувајќи неизвесност, стрес, финансиски проблеми и големи животни промени. Истовремено, намалениот страв од пропуштање нешто – ФОМО (FOMO, Fear of missing out) и присилното забавување, на некои потрошувачи им овозможија да го преиспитаат сопствениот живот. Паузите во создавањето на нова содржина, удобноста при враќањето кон старите фаворити и уживањето во димензионалноста на производите беа врвни приоритети за луѓето што поминуваа повеќе време во домот. Но, секако, не постојат две исти искуства на потрошувачот.

Технологијата стана сè поважна во животот на потрошувачите и голем број експерти покажаа загриженост за влијанието од зголемената употреба на овие уреди. Притоа, многумина од корисниците го нагласуваат негативното влијание врз менталната благосостојба и сакаат да го намалат времето поминато пред екран. Иако технологијата напредува со голема брзина, луѓето и понатаму не се уверени во нејзината реална предност во просторот на метаверзумот, NFT (незаменливите токени) и криптовалутите, поради што може да се чувствуваат исклучено. Во многу региони потрошувачите се соочуваат со финансиски тешкотии поради инфлацијата и зголемените цени на енергентите. Со оглед на тоа што економската прогноза за многу региони од светот е негативна, потрошувачите со пониски приходи, па дури и ако се финансиски сигурни, ќе сакаат да се приспособат на промените што доаѓаат.

„Локалното“ денес е синоним за „корисно во локалната заедница“.

Потрошувачите се обидуваат да најдат смисла, утеха и обновено чувство за цел во повторното поврзување со околината, заедницата и со себе. Во текот на следните две години очекуваме поларизиран одговор на опуштањето и релаксацијата за постигнување благосостојба. Очекуваме луѓето да трагаат по засолништа, кои ќе им овозможат дигитална детоксикација и можност да ја почувствуваат и повторно да се поврзат со природата. Добротворните иницијативи и проектите засновани на заедницата што произлегуваат од инспиративните соработки со брендовите, ќе одиграат суштинска улога во справувањето со нивоата на исцрпеност, охрабрувајќи ги луѓето да преземат контрола и да изградат позитивен став во услови на финансиски тешкотии. Како одговор на финансиските притисоци на потрошувачите, брендовите треба да продолжат да нудат решенија за управување со трошоците и да капитализираат од потрагата по ескапизам, нудејќи им можности за соработка и создавање нови врски.

Потрагата по практични опции и интерактивните искуства ќе продолжат да се развиваат, што значи дека технологијата ќе продолжи да има витална и влијателна улога во искуството на потрошувачот. Дигиталните достигнувања веќе имаат силно влијание и создадоа простор во технолошкиот сегмент, кој ќе продолжи да се зголемува како реакција на свртувањето на потрошувачите кон брендовите што нудат практични решенија.

Меѓународен локализам

Со толку голема глобална несигурност (економија, одржливост, синџири на снабдување и конфликти) се појавија и повеќе движења за заштита на локалните ресурси и за поттик на локалните бизниси. Тој мамурлак по пандемијата е одраз на промената на ставовите на потрошувачите кон тоа што им е важно. Повторното поврзување со локалното е исто така начин, на кој потрошувачите ќе можат да се заштитат финансиски, еколошки и психички, односно да се почувствуваат дека на некој начин повторно се враќаат во нормала.

Традиционално, терминот „локално“ означуваше две работи – или домашните брендови ги истакнуваат своите локални состојки (на пример, францускиот путер е направен од млеко од Нормандија) или глобалните брендови се обидуваат да ги привлечат локалните вкусови (на пример, брза храна направена според локален рецепт). Сепак, брендовите отидоа подалеку од ова поедноставено толкување на тоа што значи да се биде „локален“. Додека црпењето инспирација од локалните фаворити сè уште е популарно, брендовите сè повеќе го поврзуваат локализмот со одржливоста и транспарентноста. Поголемиот дел од потрошувачите ги поврзуваат локалните производи со поддржливи практики, што ги поттикнува трговците да ја негуваат таа поврзаност и да играат на картата на пократко растојание што локалните производи го поминуваат на патот до полица. Освен тоа, и брендовите стануваат потранспарентни за местото на производство на производите, овозможувајќи им на потрошувачите да погледнат зад завесата преку пренос во живо, објава на социјалните медиуми или преку QR-кодови. „Локалното“ денес е синоним за „корисно во локалната заедница“. Поради тоа, т.н. „продавници во сенка“ (dark stores), кои се користат само за достава и се лоцирани во урбаните средини, предизвикаа контроверзи во многу градови. Имено, иако тие нудат супербрза достава, можат да предизвикаат и непријатности за жителите.

Сите декларативни тврдења ќе бидат ставени на тест, а транспарентноста на брендовите ќе се оценува многу построго.

Во текот на следните две години потрошувачите сè повеќе ќе се приврзуваат за локалната средина, како реакција на растечката геополитичка и финансиска несигурност. Многумина ќе продолжат да ги поддржуваат локалните економии и заедници и ќе бараат начини за поврзување и продлабочување на духот на заедничкиот идентитет. Потрошувачите инстинктивно ќе реагираат на домашните иноватори и на брендовите што се истакнуваат со автентичност. Имајќи го тоа на ум, и меѓународните и локалните брендови би можеле да имаат корист од соработката со локални уметници или со осмислување на шеми за поддршка на специфичните потреби на локалните заедници. Заштитата на локалните бизниси и производи повеќе нема да биде ограничена на тие што се лоцирани во непосредна географска близина – таа веројатно ќе еволуира во глобално чувство за меѓународен локализам. Зајакнувањето на заедниците низ целиот свет ќе има значајна улога за привлекување на интересот на потрошувачите и за зголемување на лојалноста кон брендот. Глобалните брендови може да го искористат тој тренд доколку се истакнат со начините на кои локалните продавници, вработените или профитот се користат за подобрување на секоја заедница каде што се присутни.

Брендовите повторно ќе ги проценуваат синџирите на снабдување и потпирањето на други земји. На пример, конфликтот во Украина ја истакна ранливоста на синџирите и потенцијалните нарушувања на глобалната безбедност на храната. Долгорочно гледано, тоа ќе ги мотивира брендовите да истражуваат стратешки потези во насока на користење на домашни суровини, доколку се достапни, или барем кон алтернативни структури на извори, и тоа не само за категориите храна и пијалаци.

Сепак, глобалните синџири на снабдување нема да исчезнат. Влијанието на глобалното затоплување сè повеќе се чувствува, а како резултат на тоа сè повеќе потрошувачи ќе проверуваат дали светските брендови сериозно ја сфаќаат нивната локална одговорност. На пример, еколошки свесните потрошувачи ќе бараат следливост на суровините и поголема транспарентност за тоа како брендовите ги заштитуваат локалните ресурси, особено во земјите во развој. Потрошувачите ќе бараат доказ за етичките акредитиви на брендот, што би значело чекор понатаму од еколошко позиционирање и вклучување во корпоративната практика.

Совесна потрошувачка

Навигацијата низ неизвесноста бара мудро користење на ресурсите. Потрошувачите повторно се фокусираат на тоа што има вредност за нив и како резултат на тоа трошат посовесно. Во тешкото економско опкружување тие сакаат да донесуваат паметни финансиски одлуки, без да го жртвуваат квалитетот на животот. Тоа го надминува донесувањето на буџетски избор и оди чекор понатаму – се анализираат флексибилноста, издржливоста и одржливоста како главни фактори што ќе имаат сè поважна улога во равенката на вредноста.

Како одговор на зголемените цени на сите категории, потрошувачите се принудени постојано да ги преиспитуваат сопствените приоритети и трошењето. Од: Да го пробаме овој бренд наместо другиот, малку е поевтин, до: Да видиме дали можеме без тоа овој месец. Потрошувачите истражуваат, споредуваат и ги отстрануваат артиклите од своите кошници за да ги задоволат денешните потреби, но истовремено, и да се осигураат за утре.

До крајот на годината следуваат интензивно натпреварувачки месеци, бидејќи брендовите ќе настојуваат да привлечат нови, но и да ги задржат постојните купувачи преку понуди со добар однос цена-квалитет. Од големи попусти и замрзнување на цените, до помасовна понуда на брендови со премиум карактеристики (на пример, естетски, олфакторни, ефективност на состојките или одржливост), потрошувачите ќе бидат привлечени од производите што обезбедуваат најдобра вредност за нивните пари.

До крајот на следната 2024 година се очекува големите промени во околностите да доведат до промена во навиките и во животните стилови. На пример, намалена консумација на месо, купување производи пред истекот на рокот на траење или купување на навидум непривлечни, локално одгледани производи, кои се продаваат поевтино.

Искуствата низ кои поминале, жртвите што ги поднеле и вештините со кои се стекнале ќе ја водат перцепцијата на вредноста, дури и кога потрошувачите ќе се почувствуваат доволно финансиски безбедни. Очекуваме поголем фокус на издржливоста, флексибилноста и на безвременоста, бидејќи потрошувачите ќе купуваат помалку и ќе бараат производи што траат подолго и служат за повеќе намени. Пазарот станува сè позаситен од тврдењата за дополнителна вредност (еколошки, локални придобивки или бесплатна испорака) што резултира со зголемена скептичност и пребирливост кај потрошувачите. Сите декларативни тврдења ќе бидат ставени на тест, а транспарентноста на брендовите ќе се оценува многу построго бидејќи потрошувачите ќе продолжат да ги усовршуваат квалитетите што најмногу ги ценат.

Неодамнешните случувања им покажаа на потрошувачите колку светот е поврзан – тоа ги зголеми грижите за иднината, околината и заедницата, врз кои влијаат секојдневните избори и навики. За пет години и понатаму очекуваме појава на брендови насочени кон целта со опипливи планови и иновации што решаваат долгорочни проблеми. Потрошувачите ќе бараат вредност во целта, поддржувајќи ги доверливите брендови што ја прават разликата и се гаранција дека нивниот секојдневен избор за трошење е соодветен со иднината кон која се стремат.

 

 



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...