ФАО: Септемвриските цени на храната се речиси непроменети

Индексот на цените на храната во септември годинава во просек изнесуваше 121,5 поени, речиси непроменет во однос на август. На ова ниво, индексот е за 10,7 отсто под вредноста од пред една година и за 24 отсто под историскиот максимум, постигнат во март 2022 година.

Извор: www.fao.org

• Индексот на цените на житните култури во просек изнесуваше 126,3 поени во септември годинава, што е за 1,3 поени (1 отсто) повеќе во споредба со август, но за 21,6 поени (14,6 отсто) под неговата вредност од пред една година. Зголемувањето во септември најмногу се должи на порастот на меѓународните цени на крупното жито за 5,3 отсто.
• Во септември годинава индексот на цените на растителните масла во просек изнесуваше 120,9 поени, што претставува пад за 5 поени (3,9 отсто) на месечно ниво. Ова е вториот последователен месечен пад. Падот на индексот во септември беше поттикнат од пониските глобални цени на палминото, сончогледовото, соиното и на маслото од маслодајна репка.
• Минатиот месец индексот на цените на млекото и на млечните производи во просек изнесуваше 108,6 поени, што е намалување за 2,6 поени (2,3 отсто)  во споредба со еден месец претходно. Ова претставува деветти последователен месечен пад, со што цените се за дури 34,1 поени (23,9 отсто) под вредноста во истиот месец минатата година.
• Индексот на цените на месото* во просек изнесуваше 114,2 поени во септември годинава, што е намалување за 1,2 поени (1 отсто) во споредба со август. Тоа е третиот последователен месечен пад на цените на месото, кој доведе до пониска вредност од 6,1 поени (5 отсто) во споредба со ланскиот септември.
• Септемврискиот индекс на цените на шеќерот во просек изнесуваше 162,7 поени, што е зголемување за 14,5 поени (9,8 отсто) во споредба со август. На ова ниво цената на шеќерот ја достигна нависоката вредност од ноември 2010 година. Порастот главно произлегува од зголемената загриженост за прогнозите за глобално снабдување во претстојната 2023/24 сезона.

* За разлика од другите групи, поголемиот дел од цените што се користат за пресметка на индексот на цените на месото не се достапни кога се пресметува и се објавува овој извештај. Вредноста на индексот на цените на месото е изведена од комбинација на проектираните и забележаните цени.

Индексот на цените на храната на Организацијата за храна и земјоделство (ФАО) ја мери месечната промена на меѓународните цени на потрошувачката кошница. Тој се состои од просекот на индексите на цените на петте групи прехранбени производи, пондерирани со просечните извозни удели на секоја од групите.