БиХ: „Бинго“ ќе го отвори новиот логистички центар во Тузла

Групацијата „Бинго“ наскоро ќе го отвори новиот логистичко – дистрибутивен центар во Тузла. Од компанијата соопштуваат дека оваа клучна инвестиција е вредна над 21 милиони евра (42 милиони конвертибилни марки).

Со површина од 42.000 метри квадратни, овој центар значително ќе ги подобри логистичките капацитети и дополнително ќе ја зајакне домашната економија, рангирајќи се меѓу најголемите дистрибутивни центри во регионот, посочуваат од компанијата.

Заедно со постојниот модерен логистички и дистрибутивен центар во Сараево, новиот центар, лоциран во деловната зона „Босанска полјана“, ќе формира комплементарна целина, што ќе му овозможи на синџирот на снабудвање на „Бинго“ да постави нови стандарди за ефикасност во Босна и Херцеговина.

Една од најважните предности на овој центар е што процесот на дистрибуција ќе биде оптимизиран, додека крајните купувачите ќе имаат корист со обезбедување постојана достапност на производите и врвна свежина на храната.

Покрај класичните капацитети за складирање, ќе има и комори со контролирана температура за свежи и замрзнати производи, што ќе ги поддржи и домашните земјоделци, бидејќи „Бинго“ е најголемиот купувач на домашни производи.

На покривот на центарот ќе бидат поставени соларни панели, кои се очекува да ги задоволат енергетските потреби на објектот во поголемиот дел од годината.

Повеќе од 50 локални компании учествуваа во изградбата, која започна кон крајот на 2023 година.

Логистичките процеси во „Бинго“ центрите ќе се засноваат на напредни софтверски решенија, приспособени на специфичните потреби на магацинските и транспортните операции, во согласност со меѓународните стандарди, овозможувајќи му на „Бинго“ да ја задржи водечката позиција во синџирот на снабдување.

Извор: Pluton Logistics

Фото: „Бинго“