Србија забрани извоз на млеко, освен за Македонија и Албанија

Со цел да овозможи редовно снабдување со млеко на населението и да се спречи одливот на суровини надвор од границите на земјата, владата на Србија на денешната седница донесе одлука за забрана за извоз на млеко, освен за Македонија и Албанија.

Владата усвои измена на регулативата за ограничување на цената на основните прехранбени производи, која ќе важи до 30 септември. Со измената, цената на трајното млеко со 2,8 отсто млечна маст во пакување од еден литар се ограничува на 128,99 динари.

Освен ограничувањето на цената на UHT-млекото, ограничени се и трговските маржи за да се спречат шпекулативни активности на пазарот, пренесе РТС.

Владата на Србија продолжува со целосна будност да ја следи состојбата, при што ќе обезбеди доволни количества млеко за потребите на граѓаните, се наведува во соопштението.