Над 60 проценти од компаниите не можат да најдат стручен кадар

Дури 62% од компаниите имаат недостаток од стручен кадар за своите потреби, покажале анализите на Стопанската комора од каде велат дека е потребно заедничко работење во интерес на државата.

Од друга страна морам да потенцирам дека во извештајот на Европската Комисија се потенцираше дека 80% од невработените се долгорочно невработени заради тоа што немаат соодветни стручни вештини, се јавува како парадокс, од една страна немате доволно кадар, а од друга страна има невработен кадар. И компаниите потенциираа дека има неурамнотеженост на она што се бара од компаниите и она што се бара од образованието, изјави  Наташа Јаневска од Комората. 

Јаневска вели дека причината за тоа е неусогласената уписна политика, и токму затоа со дијалогот за унапредување на средното стручно образование меѓу училиштата, министерството за образование и бизнис заедницата може да се креира уписна политика согласно потребите на компаниите.

Учениците не можат да стекнуваат само со теоретска настава, ако таа не најде применливост во самата работна компанија, тогаш не можеме да зборуваме за квалитетно образование, изјави таа. 

Дијалогот е од исклучтелна важност не само за учениците и локалната самоуправа, туку и за целокупниот раст и развој на нашата држава, бидејќи со овој процес ја обезбедуваме потребната работна сила која е дефицитарна во земјата и која е еден од поважните фактори за напредок, рече Јетон Шаќири, министер за образование.

Од министерството за образование велат дека како резултат на овој дијалог, минатата година во овој регион беа отворени пет дуални паралелки, од нив три во Битола и по една во Демир Хисар и Ресен.