Пристигаат 80 милиони евра помош од ЕУ за Македонија

Европската Комисија најави дека денеска ќе бидат испратени дел од ветените суми макроекономска помош за Северна Македонија, пренесе МИА. 

Од трите милијарди евра макроекономска асистенција предвидена за земјите од соседството на ЕУ, Европската Комисија денеска испраќа 80 милиони евра за Македонија, 50 милиони евра за Косово, 30 милиони евра за Црна Гора, како и 300 милиони евра за Тунис.

Еврокомесарот за економија, Паоло Џентилони, ја поздрави веста како „конкретен чекор напред“ во борбата против Ковид-19 и неговите последици и вети дека ЕУ останува посветена да им помага на своите соседи во овие тешки времиња.

За Македонија ова е втората и последна транша од предвидените 160 милиони евра макроекономска помош.

Европската Комисија информираше дека земјата ги исполнила условите за ослободување на последната транша, овие услови вклучуваат зајакнување на фискалното владеење и транспарентност, борбата против корупцијата, подобрување на супервизијата во финансискиот сектор како и на бизнис климата и справување со невработеноста на младите.