ЕУ прогнозира економски пораст од 3,7% на Македонија

Европската Унија прогнозира економскиот пораст во земјава годинава да биде 3,7% и закрепнувањето да се забрза во текот на годината.

Очекувањата се дека во 2022 година порастот на економијата ќе биде 3,8%. Закрепнувањето, според ЕУ, ќе се должи главно на домашната побарувачка, додека надворешниот сектор веројатно нема да придонесе за пораст.

Овие прогнози се пониски од тие што во понеделникот ги презентираше Народна банка, според која порастот на домашниот бруто-производ годинава ќе биде 3,9%, а исто толкав ќе биде и следната година. За 2023 година се очекува тој да достигне до 4%. Според макроекономските проекции на централната банка, инфлацијата годинава би била 2,2%, што е зголемување во споредба со претходната проекција која изнесуваше 1,5%.