Претставуваме: „Миладинови“

 

Разговараше: Данче Драгинова, danche@instore.mk

 

Продавницата „Миладинови" е отворена во март 2013 година, на продажен простор од 17 квадратни метри. Асортиманот го сочинуваат околу 1.000 артикли што ги задоволуваат секојдневните потреби на потрошувачите, како што се: леб, јајца, млеко и млечни производи, а располага и со избор од кондиторски производи, безалкохолни пијалаци, козметика, средства за чистење... Во асортиманот не се вклучени алкохолните производи и цигарите.

 

Од трговските групи во асортиманот не се застапени алкохолните пијалаци, затоа што тие бараат дополнителни инвестиции (поголем простор, ладилници што се заклучуваат), а тука се и низата ограничувања предвидени со закон. Исто така, не држиме и цигари, од безбедносни причини, вели сопственичката Марина Миладинова, на возраст од 31 година.

 

Во изборот на асортиманот, Марина, пред сè, се раководи според барањата на клиентите и понудата на комецијалистите, кои знаат и умеат да ги презентираат и понудат своите производи, без да вршат притисок. При набавка на стоката, тие излегуваат во пресрет, затоа што меѓусебните фер и коректни односи се од интерес за обете страни.

 

Откако претходно неколку години била без работа, Марина во договор со семејството решила да отвори и да води сопствена продавница. Претходно работела во прехранбена продавница, а стекнатото искуство и знаење претставувале одлична основа за развој на „нешто свое".

 

Добро ја познавав работата и ги имав сите потребни предзнаења пред да се одлучам за предизвикот наречен сопствена продавница. Голем дел од производите ми беа познати, а со текот на работата подетално ги научив и нивниот состав и специфичности. Исто така, не ми беше непозната и работата со фискална каса и  со компјутер, раскажува Марина за своите почетоци.

 

Сегашната локација веднаш до градскиот пазар е од особена важност за функционирањето на продавницата „Миладинови". Локацијата е лесно пристапна и особено прометна, а располага и со доволно простор за паркирање.

 

Продавницата има двајца вработени, членови од семејството, кои излегуваат во пресрет на потребите на клиентите и располага со една наплатна каса. Најчести и најлојални купувачи во „Миладинови" се жителите од околината, кои секојдневно купуваат тука. Сепак, локацијата е главниот „виновник" и за други лојални потрошувачи од околните градови (Берово, Делчево), како и од селата, кои поминуваат одовде со автомобили и застануваат за да пазарат. Во тоа се состои и посебноста на оваа маалска продавница, што ја прави некарактеристична, како што ја нарекува сопственичката.

 

Локацијата не би ја менувале за никоја друга! Луѓето веќе нè знаат, а и близината до пазарот за нас е огромна придобивка и предност. Да сме само дваесетина метри подолу, веруваме дека во голема мера прометот ќе се намали, објаснува Марина.

 

Според мислењето на сопственичката, иако поголемите маркети имаат ценовна предност, сепак и малите продавници имаат одредени предности и поголеми можности за непосредна и љубезна релација со купувачите. Исто така, на страната на „малите" е и побрзата услуга: Побрзо ги услужуваме клиентите затоа што веднаш ни се обраќаат нам, а ние точно знаеме каде се позиционирани производите. На тој начин, тие не мора да талкаат меѓу полиците и да ги бараат производите, со што заштедуваат на време.

 

Засега сопственичката е фокусирана на развојот на оваа продавница и не размислува за проширување на бизнисот и отворање на нова, затоа што тој чекор носи дополнителни и поголеми обврски и одговорности.