„Еуромонитор интернационал“: Стремеж кон оптимизам

Годишниот извештај на „Еуромонитор“ за глобалните потрошувачки трендови открива нови сознанија за вредностите на потрошувачите и нивната мотивација за купување

Извор: „Еуромонитор интернационал“, www.euromonitor.com

Влијанието на вештачката интелигенција (ВИ), одржливоста, социјалните, економските и политичките фактори се клучни за разбирање на глобалните трендови во 2024 година. Извештајот „Потрошувачки трендови за 2024“ ги открива трендовите што обезбедуваат увид во еволуирачките вредности на потрошувачите и истражува како нивното однесување ги редефинира мотивираноста и потребата за купување.

Според „Еуромонитор“, топ-6 потрошувачки трендови за 2024 година се:

• Вештачка интелигенција. Новите алатки еволуираа во кокреатори што влијаат врз одлуките на потрошувачите и ги преобликуваат нивните очекувања за ангажман на брендот. Платформите за вештачка интелигенција сè повеќе ќе се интегрираат во секојдневниот живот на потрошувачите. Компаниите треба да користат генеративна ВИ за да ги подобрат персонализацијата и целокупното искуство на купувачите.
• Пријатни дистракции. Потрошувачите бараат бегство од стресот и вознемиреноста, кои го окупираат секојдневниот живот. Околу 29% од потрошувачите би се чувствувале удобно кога брендовите би ги следеле нивните емоции и би ги персонализирале искуствата според нивните расположенија.
• Екоманипулацијата во аут. Потрошувачите се обидуваат да живеат поодржливо и се прашуваат дали компаниите и владите целосно ги користат достапните ресурси за да остварат значаен импакт. Тие очекуваат од организациите да ја зајакнат одржливоста и да ги докажат нивните еколошки ветувања.
• Прогресивно поларизирани. Политичките и социјалните прашања се во сржта на личниот идентитет. Овие системи на верувања влијаат врз перспективите, вредностите и ставовите на потрошувачите, кои не се воздржуваат од јавно изразување на сопствените убедувања.
• Хакери на вредноста. Со тековната криза на трошоците за живот, потрошувачите го приспособуваат финансискиот начин на размислување и 44% од нив планираат да заштедат повеќе пари. Тие користат сè попаметни стратегии за да го максимираат буџетот и да ги добијат најдобрите понуди.
• Велнес-прагматичари. Потрошувачите бараат брзи и ефективни решенија за подобрување на физичката и менталната благосостојба. Докажаната ефективност има значајна улога во нивните одлуки за купување.

1. ВЕШТАЧКА ИНТЕЛИГЕНЦИЈА

Имагинативна проникливост

Генеративната вештачка интелигенција поттикнува ресетирање на екосистемот. Новите алатки станаа кокреатори што влијаат врз одлуките на потрошувачите и ги преобликуваат нивните очекувања за ангажман на брендот. Технологијата за ВИ сè подлабоко ќе се интегрира во секојдневниот живот на потрошувачите, така што компаниите треба да ја користат генеративната вештачка интелигенција за да ја подобрат персонализацијата и да го збогатат целокупното искуство на купувачите.

Креација на чет-ботови

Генеративната ВИ го освои цел свет. „Чет-ГПТ“ достигна 100 милиони корисници во рок од два месеца од лансирањето, со што стана една од најбрзо растечките апликации во историјата. Брзо следуваше и поплава од други апликации што се потпираат на истите големи јазични модели (LLM – Large language model). Брзото усвојување е резултат на достапната природа на овие платформи. Потрошувачите можат да произведат многу содржини – од креативно пишување до музика и уметност, со мала техничка експертиза. Напредните алгоритми и LLM, во комбинација со едноставни интерфејси, ја ставаат моќта на машинското учење во рацете на корисникот.

Луѓето ги користат овие алатки за да приредуваат содржини, да развиваат рецепти, да планираат патувања, да создаваат аватари итн. Продуктивноста и креативноста се главните двигатели за нивна употреба. Потрошувачите продолжуваат да ги тестираат можностите на оваа технологија и истото го очекуваат и од брендовите.

Компаниите би можеле да создадат чет-ботови и гласовни асистенти. Повеќе од 40% од потрошувачите изјавиле дека им се корисни гласовните асистенти што нудат персонализирани препораки, а помалку од една петтина го изјавиле истото за користењето ботови што одговараат на сложени прашања за услуги. Генеративната ВИ може да ги подобри или усоврши овие функционалности, што ќе резултира со подобро корисничко искуство.

Иновација и автоматизација

Доколку алатките за вештачка интелигенција ги користи ефективно – и за внатрешни цели и за ангажман на купувачите, овој тренд ќе му овозможи конкурентна предност на брендот. Генеративните решенија за ВИ го поддржуваат процесот на иновации, што би можело да го забрза процесот за пласман на пазарот. Креирањето содржини и идеи може да се забрза со користењето на овие алатки, а бизнисите што ги користат можностите на оваа технологија можат да синтетизираат кориснички податоци за да го водат развојот на нов производ. Дополнително, интеграцијата на фидбекот од купувачите во голема мера ќе им помогне на компаниите да ги приспособат маркетинг-кампањите, производите и услугите.

Освен тоа, бизнисите можат да ја подобрат функционалноста на пребарувањето, откривањето нови производи и персонализацијата. Со користење генеративни ВИ-интеграции се подобрува можноста за анализа на потрошувачите и за создавање уникатни искуства за нив.

Влијанието на ВИ-технологијата не може да се игнорира и компаниите што ѝ даваат приоритет на автентичната автоматизација ја предводат револуцијата. Сепак, управувањето со вештачката интелигенција и понатаму е во „сива зона“. Затоа, компаниите треба добро да ги разберат импликациите на генеративната ВИ и да воспостават јасни стандарди за одговорно спроведување.

Како компаниите очекуваат генеративната ВИ да го подобри искуството на купувачите?

(% од професионалците во индустријата)

• Со анализа на податоците за купувачите можат да се креираат поинтелигентни предлози за купување (49%);
• Врз основа на податоците за потрошувачите се создаваат потаргетирани маркетинг-кампањи (44%);
• Чет-ботовите за услуги на потрошувачите ги имитираат човечките интеракции (44%);
• Се овозможува интеграција во планот на купувањето (42%).

(„Voice of the Industry: Digital Survey“ – август/септември 2023 година, n=169)

 

Три тактики и совети за компаниите:

• Да ги евалуираат внатрешните процеси и да ги идентификуваат можностите на генеративната ВИ-технологија за подобар аутпут.
• Да ги усвојат алатките за автоматизација и оптимизација на искуството на купувачите.
• Да ги анализираат и искористат податоците за купувачите за таргетиран маркетинг и развој на нови производи.

2. ПРИЈАТНИ ДИСТРАКЦИИ

Слатко бегство

Потрошувачите сакаат да го оттргнат умот од секојдневните стресови. Во денешниот современ свет неопходно им е мало ослободување од грижите и шанса да избегаат од секојдневието. Пријатните дистракции ги освежуваат и оживуваат емоциите. Моментите исполнети со возбуда и добри чувства можат да остават значаен впечаток во нивниот живот. Брендовите што наоѓаат можности да ги посипат со блаженство ќе изградат силни врски со купувачите.

Моменти на блаженство

Постојана криза. Во последните неколку години исполнети со пандемија, економска несигурност, политички немири и климатски катастрофи, потрошувачите чувствуваат огромен притисок. Целиот тој негативен шум го зема својот ментален данок. Повеќе од кога и да е, луѓето денес се во потрага по дневна доза на среќа која ќе го разубави нивниот свет.

Пријатните дистракции се моменти што предизвикуваат позитивни чувства и будат возбудливи, охрабрувачки и разиграни емоции. Овие интеракции им помагаат на луѓето да почувствуваат радост и да се ослободат од напнатоста, дозволувајќи им да ги остават грижите зад себе – макар и на неколку минути. Малите (неочекувани) изненадувања и ситните радости можат до одреден степен да ја задоволат оваа потреба, така што купувачите бараат производи што ги предизвикуваат тие наградувачки емоции. Модното лудило за т.н. „допамин“ стил на облекување е пример за овој тренд – потрага по забава што возбудува или искуства што служат како привремено бегство.

Потрошувачите сакаат да ја компензираат вревата од секојдневниот живот со инфузија од забава. Пријатните дистракции често имаат незаборавно влијание, што ги подобрува перцепцијата на брендот и односите со купувачите.

Позитивност и разиграност

За да обезбедат моментално задоволство и да воспостават подлабоки врски со купувачите, за компаниите е неопходно да создаваат пријатни дистракции. Мудрото и креативно испраќање пораки дополнително ќе ја ангажира нивната публика. Малите детали и гестови се особено важни и можат многу да помогнат, а емоционалниот маркетинг доаѓа во прв план. Брендовите треба да се фокусираат на поврзување на производите со оваа културна желба за оптимизам. Ваквите тактики можат да предизвикаат насмевка кај купувачите и тоа позитивно чувство ќе остане поврзано со брендот.

Ограничените изданија на производи или колекции со живописен дизајн ќе продолжат да се појавуваат на пазарот. Светлите бои и смелите слики привлекуваат внимание кога се користат стратешки. Но, тие елементи мора да бидат комплементарни за да се избегне прекумерна стимулација. Интерактивните искуства со брендот, исто така, се магнет за желбата на потрошувачот за ескапизам. Добро осмислените и организирани настани, кои ги комбинираат технологијата, сторителингот и забавата, ќе ја воодушеват и забавуваат публиката.

На крајот на краиштата, компаниите не треба да се плашат да бидат смешни или разиграни, но важно е секогаш да останат доследни на идентитетот на брендот.

• 43% од професионалците изјавиле дека нивната компанија користи сторителинг и привлечни пораки за да им пренесе на потрошувачите информации за нови или подобрени производи („Voice of the Industry: Innovation and Lifestyles Survey“ – март/април 2023 година, n=122)
• 33% од професионалците изјавиле дека нивната компанија експериментира со искуствени формати на продавници („Voice of the Industry: Retail Survey“ – јуни/јули 2023 година, n=186)

Три тактики и совети за компаниите:

• Да вклучат разиграни, забавни и позитивни пораки во интеракциите со купувачите.
• Да додадат бои, визуелни ефекти или аудиопораки во брендирањето и дизајнот на производите.
• Да создадат незаборавни и пријатни моменти, со кои ќе изградат посилни врски со публиката.

3. ЕКОМАНИПУЛАЦИЈАТА ВО АУТ

Климатска загатка

Потрошувачите не можат сами да се справат со климатската криза. Тие преземаат чекори за да живеат одржливо, но истовремено се прашуваат дали компаниите и владите ги користат сите можни ресурси за да се почувствува вистинската промена. Луѓето се свесни дека нивниот еколошки избор помага до одреден степен, но вистинската промена треба да биде колективен напор. Оттука, тие ја враќаат одговорноста на компаниите. Сите организации мора да преземат одговорност за нивниот јаглероден отпечаток и да го докажат сопственото позитивно влијание.

Еколошка исцрпеност

Еколошката исцрпеност се чувствува на глобално ниво. Во последните години потрошувачите направија забележителни чекори за да ја заштитат планетата, но климатските катастрофи не го забавија темпото. Екстремните временски непогоди, интензивните шумски пожари, сушите и разорните поплави предизвикуваат хаос во заедниците низ целиот свет. И како што температурите продолжуваат да растат, се зголемува и скептицизмот на потрошувачите. Тие сфаќаат дека со нивните индивидуални придонеси можат да направат малку. Затоа, испраќаат гласни пораки до организациите да ја зајакнат одржливоста и да ги докажат нивните еколошки ветувања, без компромис за празни ветувања и лажни наративи.

Одговорни и достапни

Не е тајна дека корпорациите со години изнесуваа лажни тврдења или недоволно испорачуваа иницијативи за одржливост, но денес тие се под лупа на потрошувачите. Редукцијата на емисиите е фокусна област за намалување на јавниот револт. Прецизното мапирање на јаглеродниот отпечаток на компаниите е сложено – тие треба да ги мерат директните и индиректните емисии низ целиот синџир на снабдување. Тоа за нив е голем предизвик.

Добрата вест е што инвестирањето во долгорочни енергетски ефикасни мерки може да биде стратегија за намалување на трошоците, а круцијално е партнерството со вистинските доставувачи.

Целосната транспарентност, исто така, е критична. Компаниите треба да споделат конкретни докази за одговорни деловни практики и како потврда за напредокот. На пример, ако производот е направен од материјал што се рециклира, може на пакувањето да го наведат количеството отпад што е заштедено. На тој начин, купувачите веднаш ќе знаат како нивната одлука за купување ќе направи разлика. Достапноста е уште една проблематична точка, особено при затегнати економски услови. Одржливите артикли често имаат повисока цена, па затоа е неопходно производителите да ги демократизираат овие производи за повеќе купувачи.

Планови за одржлив развој на производи

(% од професионалците што изјавиле дека нивната компанија планира да развие производи со одредени ознаки за одржливост)

• Еколошки ознаки (62%);
• Ознаки за одржливо пакување (60%);
• Ознаки за ниска или јаглеродно неутрална содржина (58%);
• Ознаки за одржливи извори (56%);
• Ознаки за заштеда на вода (40%);
• Ознаки за нулта отпад (32%).

(„Voice of the Industry: Voice of the Industry: Sustainability Survey“ – февруари 2023 година, n=573)

Три тактики и совети за компаниите:

• Да развиваат стратешки партнерства низ синџирот на снабдување за да го намалат јаглеродниот отпечаток и да практикуваат циркуларна економија.
• Да бидат искрени – ознаките и тврдењата да ги темелат на факти, со опипливи докази да им помогнат на потрошувачите да ги разберат нивните заложби.
• Да ги реинвестираат приходите за производство на достапни и одржливи производи.