Анализи

Нови можности за иновации во сегментот приватни трговски марки

13 сеп 2021

Комбинацијата од подобрената перцепција на купувачите за производите и моменталната економска заднина создава можности за иновации и за пораст.

Автор: Автор: Џон Рајт, раководител за анализа на европскиот пазар, ИГД

Заздравување во облик на буквата „К“

Целосното економско влијание од пандемијата допрва ќе се почувствува низ цела Европа, со одредени непосредни промени на краток рок. Како што владите ја намалуваат или отстрануваат економската поддршка, прашањето за (не)вработеноста веројатно ќе станува уште попредизвикувачко.

Во некои земји, како што е Велика Британија, закрепнувањето почна малку побрзо отколку што се очекуваше. Тоа е знак за надеж дека економскиот капацитет може да се врати на нивото пред кризата порано отколку што се предвидуваше во најлошите сценарија. Околностите сугерираат дека закрепнувањето од ковид-19 нема да се одвива идентично за сите учесници во економијата: некои ќе почнат да забележуваат и да чувствуваат напредок (горниот дел од буквата „К“), додека други ќе заостануваат или ќе останат на исто ниво (долниот дел од буквата „К“).

Перцепцијата на купувачите продолжува да се подобрува

За трговците на мало и производителите на приватни трговски марки, подобрената перцепција за приватните марки создава и предизвици и можности на краток рок, кои веројатно ќе се развиваат различно од земја до земја, додека купувачите се приспособуваат на индивидуалните услови. Иако тоа ќе значи проширување на инвестициите во приватните трговски марки од иновативна и од маркетиншка гледна точка, веројатно ќе се зголеми и можноста да се изгради долгорочна лојалност од купувачите, преку исполнување на нивните потреби за производот и достапноста.

За трговците на мало и производителите на приватни трговски марки, подобрената перцепција за приватните марки создава и предизвици и можности на краток рок, кои веројатно ќе се развиваат различно од земја до земја.

Според резултатите од нашето истражување „Шопер виста“*, перцепцијата на британските купувачи за приватните трговски марки во текот на минатата година се зголеми. Во третиот квартал од 2020 година 71 отсто од купувачите изјавија дека се многу задоволни од квалитетот на приватните трговски марки, а 66 отсто велат дека им веруваат на трговските марки исто колку и на брендовите. Јасно е дека тоа е огромна можност за трговците на мало – 43 проценти од купувачите се согласија дека поголемиот дел од прехранбените производи што ги купуваат се трговски марки, број што се зголеми за 2 отсто од почетокот на годината.

„One-stop shop“ поттикнува поголеми кошници

Трендот кон помал број, поголеми пазарувања за време на пандемијата ја смени фрагментацијата на моделите за трошење на купувачите, што сѐ повеќе се гледаше и пред пристигнувањето на пандемијата.

Од аспект на приватните трговски марки, концентрацијата на посетите на купувачите во помал број физички продавници не е од корист еднакво на сите категории. Неодамна објавените податоци на ПЛМА** за европскиот пазар покажаа дека, на регионално ниво, уделот на приватните трговски марки е најголем во категориите пекарски производи и бисквити, свежи, млечни и производи за домашни миленици.

Во поголем дел од случаите еволуцијата на приватните трговски марки се поврзува со корпоративните стратегии и иницијативи на трговците на мало, особено во врска со заложбите за здравје и одржливост.

Трговците ги поттикнуваат иновациите

Трговците продолжија да воведуваат иновации во сегментот приватни трговски марки за време на пандемијата. Во поголем дел од случаите еволуцијата на приватните трговски марки се поврзува со корпоративните стратегии и иницијативи на трговците на мало, особено во врска со заложбите за здравје и одржливост.

Трговскиот синџир „Окадо“ во Велика Британија неодамна ја релансира приватната трговска марка, која е дел од поширокото ребрендирање од зелена „јаболко“ боја во виолетова „грозје“ боја. Целта на ребрендирањето е производите да се истакнат од многуте постојни нијанси на зелена боја, кои се присутни во секторот трговија со прехранбени производи. Новиот смел дизајн, за трговскиот бренд е и платформа за подобрување и рефлексија на заложбите за одржливост. Трговецот тврди дека новиот асортиман користи 27 тони помалку пластично пакување, отстранети се 640.000 пластични мрежи и се елиминирани 9 милиони несуштински компоненти на амбалажата. „Окадо“, исто така, ги отстрани и лепливите етикети од кутиите со јајца, испишувајќи ги информациите за производот директно на кутијата, со што заштедува 10 тони хартија годишно.

Во меѓувреме, француски „Интермарше“ ја обнови основната приватна марка Top Budget. Линијата од 600 производи доби нова променета амбалажа со ново лого, со кое производите ќе бидат повидливи на полица. Фокусираното вложување во прехранбените производи и во квалитетот на состојките се покажа и преку отстранувањето на одредени адитиви и со додавањето на ознаката Nutri-Score на сите производи во линијата.

Како дел од различни линии, португалскиот „Континенте“ го прошири асортиманот со приватни трговски марки и вклучи повеќе здрави грицки, еколошки и вегетаријански производи, за да се задоволи побарувачката на купувачите во овие сегменти. Под асортиманот на Powered by Plants, трговецот воведе плескавици без месо, нагети и ќофтиња направени исклучиво од растителни протеини, во линијата Equilíbrio додаде грицки, а во Eco – еколошки производи за чистење. Сите производи од асортиманот се изработени од одржливи суровини, кои се биоразградливи и се продаваат во амбалажа направена од рециклирачки материјали.

Трговците треба да ги продолжат инвестициите во овој сегмент и да најдат нови начини за активирање на приватните трговски марки во продавницата и преку интернет.

Конечно, за навистина да нагласи дека може да се насочи кон купувачи од различни ценовни профили, „Дешпар“ – Италија неодамна воведе неколку нови производи во портфолиото на сопствените трговски марки, кои таргетираат купувачи со различни расположливи буџети. Најпрвин, додаде неколку нови производи под брендот Special Edition, како што се деликатеси и традиционални сирења. Понатаму, воведе осум нови пици во асортиманот смрзнати производи. Четири од пиците се направени со традиционални состојки од цела Италија, додека другите четири се со поедноставни вкусови и се насочени кон купувачите што бараат алтернатива на вредноста.

Одржување на порастот

Краткорочните и среднорочните прогнози за приватните трговски марки во Европа се чини дека се позитивни. Комбинацијата од подобрената перцепција на купувачите за производите и моменталната економска заднина создава можности за иновации и за пораст. Трговците треба да ги продолжат инвестициите во овој сегмент и да најдат нови начини за активирање на приватните трговски марки во продавницата и преку интернет. Во многу земји овие чекори треба да им помогнат на трговците да имаат корист на подолг рок.

За авторот: Џон Рајт го води тимот за анализа на европскиот пазар во ИГД и има повеќе од еднодецениско искуство во истражување на малопродажбата низ целиот регион. Редовно ги посетува пазарите низ регионот, следејќи ги најновите формати, приватните трговски марки, маркетингот и дигиталните стратегии. ИГД обезбедува глобален увид, анализа и прогнози за пазарот на прехранбени и производи за широка потрошувачка, со што им помага на клиентите да се движат низ предизвиците на малопродажниот пејзаж што постојано се менува.

* Brand and private label quarterly update – December 2020

** PLMA International Private Label Yearbook



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...