Во следните две години секое десетто работно место во светот ќе биде непополнето

Компаниите ширум светот ќе продолжат да се соочуваат со горливиот проблем на недостиг на квалитетна работна сила до 2025 година.

Се предвидува дека секое десетто работно место ќе остане непополнето, а 93 отсто од компаниите планираат недостигот на работници да го компензираат со зголемување на опсегот на работа за сегашните работници, се резултатите од новото истражување на меѓународната консултантска фирма „Хорват“ (Horvath), пренесува biznis.rs. 

Истражувањето во кое учествуваа 50 финансиски директори на компании од Европа и светот, од кои 43 отсто остваруваат приходи кои надминуваат милијарда евра, а третина имаат над 5.000 вработени, покажа дека ќе има пораст на трошоците за работна сила за 16 отсто.Студијата потврди дека зголемените трошоци за работна сила, јазот помеѓу расположливите и потребните вештини на вработените, како и неможноста навреме да се пополнат работните места, се меѓу најголемите предизвици со кои ќе се соочат компаниите во наредниот период.

Претставникот на консултантската куќа „Хорват“, Роберт Ќузела - Пиљац, објасни дека се очекува да предизвика зголемување на обемот на работа на постојната работна сила, зголемување на трошоците за работна сила, забавување на имплементацијата на нови деловни решенија во компаниите, но и поголема побарувачка за одреден збир на вештини кај вработените.

Иако често се нагласува недостатокот на вработени со одредени технички вештини, како програмери или работници во областа на градежништвото или туризмот, нашето истражување покажа дека на компаниите најмногу им недостасуваат ‘меки вештини’. Тоа се вештини поврзани со интеракција со колегите, како што се комуникација, работна етика, мотивација, добра соработка и изнаоѓање решенија. Следат деловни вештини, како разбирање на работењето на компанијата и примена на дигитални решенија, и на крајот функционални вештини, како што се разбирање процеси, познавање на ИТ системи и аналитички вештини, кажа Ќузела - Пиљац.

Околу 76 отсто од менаџерите причината за отежнатиот пристап до вработените ја гледаат во жестоката глобална и регионална конкуренција, речиси половина од испитаниците наведуваат демографски промени, додека пет отсто од нив сметаат дека нивната компанија плаќа значително помалку од конкуренцијата.

За компаниите да задржат квалитетен кадар и да привлечат нови, неопходно е да се понудат јасни можности за дообука и напредување, како и да се скрати самиот процес на селекција на вработени. Многу е важна улогата на одделот за човечки ресурси, кој треба да размислува и да дејствува стратешки, како и да води сметка како очекувањата на новите генерации можат да комуницираат со целите на компанијата, за да се обезбеди одржлив раст на бизнисот, посочи Ќузела – Пиљац. 

Тој додаде дека зајакнувањето на атрактивноста на работодавачот, преку подобрување на внатрешните процеси и развој на квалитетни дигитални решенија, е уште еден начин за привлекување квалитетен кадар.

Извор: Бизнис.рс