„Ајсланд“ отвора к-продавници

Трговецот со смрзната храна „Ајсланд“ лансира нов формат продавници, наречен „Свифт“ во Велика Британија. Првата продавница од овој тип беше отворена во март во градот Њукасл со целосно нов концепт и со слоган „Брзо. Свежо. Локално“.

К-продавницата (C-store, convenience store) се наоѓа во поранешен објект на трговецот на фреквентна локација. Асортиманот го сочинуваат околу 3.000 производи и додека во традиционалните продавници на „Ајсланд“ фокусот е на смрзнатите производи, новиот формат приоритет им дава на свежите.

Новиот изглед ги руши традиционалните бариери меѓу смрзната и разладената храна за да обезбеди комплетен асортиман на решенија за оброци, со одлични комбинации за појадок, ручек и за вечера, велат од компанијата.

Новиот формат „Свифт“ може да стане конкурент на „Теско експрес“, „Сеинсберис локал“ и на „Алди локал“.