Словенија: Најниска стапка на инфлација во последните три години

Меѓугодишната стапка на инфлација во Словенија во јуни изнесува 1,5 отсто, а минатата година во истиот период изнесувала 6,9 отсто.

Државниот завод за статистика соопшти дека тоа e најнискиот раст на цените од јуни 2021 година, кога годишната стапка на инфлација изнесувала 1,4 отсто. Во однос на мај потрошувачките цени пораснале за 0,4 отсто, пренесува „Мина“ повикувајќи се на „Сибиз“.

Најголемиот придонес во годишната инфлација од 0,5 процентни поени имало зголемувањето на цените во рестораните и хотелите за 6,7 отсто. Следувало зголемување на цените  на добрата и услугите за 4,9 отсто, кои додале 0,4 процентни поени.

Цените на услугите на годишно ниво во просек пораснале за 4,2 отсто, а на стоките за 0,2 отсто. Полутрајнта стока поскапела за 1,5 отсто, а стоката за дневна потрошувачка за 0,3 отсто, додека кај трајната стока има поевтинување од 1,4 отсто.

Во меѓугодишната споредба најмногу поевтинување има кај електричната енергија, гасот и останатите горива за 7,7 отсто, што ја ублажило инфлацијата за 0,6 процентни поени.

 Потрошувачките цени во првата половина од годинава пораснале за 2,4 отсто а во истиот период лани имале пораст од 4,9 отсто.

 Извор: biznis.rs

Фото: Pexels