InStore ексклузивно од Париз: Македонските компании се претставија на саемот „Сиал“

„Инсторе медиа“ присуствува на една од најголемите меѓународни саемски манифестации во прехранбената индустрија, саемот „Сиал“ што се одржува во Париз од 19 до 23 октомври , на кој и годинава се претставија македонските компании од прехранбената индустрија.       

 Компаниите „Аграр Ко“, „Ларс“, „Екслузив“, „Лион“, „Фруктана“, „Мако маркет доо“, „Хина продукст“, „Макс фуд индустри“, „Иноспектар“, „Конимекс холдинг“, „Соко“, „Винчини – Макпрогрес“, „Випро“, „Вори“ ќе ги претстават своите производи на саем, а Националниот штанд и учеството на македонските компании е во организација на Министерството за земјоделство, шумарство и водостопанство.

Годинава „Сиал“ прославува 60 години од постоењето и со својата долгогодишна традиција претставува водечка деловна платформа преку која производителите и извозниците ги договораат идните деловни аранжмани со трговците, купувачите, извозниците, дистрибутерите, експертите од најголемите светски малопродажни синџири и претставници од „Хорека“ синџирот на продажба.

На саемот се промовираат десет тематски целини во рамките на единаесет изложбени павилјони и тоа: национални павилјони и региони од светот, готова храна, замрзната храна, млечни производи, овошје и зеленчук, месо и риба, кондиторски производи, долготрајни производи, пијалаци, органска храна и здрави грицки.

 „Сиал“ се одржува секоја втора година и на саемот се претставуваат преку 7.500 излагачи од 127 држави со над 400.000 високвалитетни производи. Се очекува саемот да го посетат над 285.000 стручни посетители, а како и секоја година InStore има свој претставник на саемот.