Ќорлука најави почеток на производството во „Ласта“

До крајот на годината ќе почне производството во фабриката за кекси „Ласта“, најави Петар Ќорлука, сопственик на „Виолета“, кој  ја купи и „Ласта“. 

Мислам дека без вложувања, „Ласта“ не би можела да се врати на старите патеки. Сега правиме истражувања на пазарот по категории и планираме да ги подобриме старите производи на „Ласта“, да развиеме некои нови и да видиме што е тоа што му недостасува на пазарот, а кај нас го нема. Видливо е дека трендовите во Европа е да се прават слатки со што помалку шеќер, значи здрава исхрана, па планот е да се оди во таа насока. Фокусот е на инвестирање во нови технологии, рецептури и во што подобри суровини, изјави Ќорлука.   

„Ласта“ ќе го почне производството на пет производи, а и тоа ќе се случи откако објектите целосно ќе се реновираат и ќе стигне новата технологија. 

Откако ја купи „Ласта“, Ќорлука најави дека за обнова и оспособување на производството во фабриката според стандардите кои ги бара ЕУ, планира да вложи 10 милиони евра.