Продолжен рокот на траење на лиценците и на овластувањата во транспортот

Со уредба се зголемува времетраењето на транспорот за време на вонредната состојба од 9 на 11 часа дневно, за да се обезбеди непречен проток на стоки во периодот на корона кризата.

Министерот за транспорт и врски Горан Сугарески на денешната прес-конференција информираше дека дневното време на управување со возило се зголемува од 9 на 11 часа, додека на неделно ниво се зголемува од 56 на 60 часа. Вкупното времетраење на управувањето на возила се зголемува од 90 на 100 часа на кои било две последователни недели за времетраење на вонредната состојба.

Возачите можат да возат пет и пол часа, а потоа возачот е должен да направи пауза од најмалку 45 минути. Претходно можеа да возат три и пол часа, па да прават пауза. Редовниот одмор за времетраење на вонредната состојба се намалува од 11 на 9 часа, изјави министерот за транспорт и врски Горан Сугарески.

Донесените мерки се на барање на превозниците, кои би овозможиле побрз транспорт на стока во патниот сообраќај, намалување на гужвите на граничните премини и на локациите за одмор.

Во однос на железничкиот сообраќај, министерот Сугарески појасни дека либерализација во железничкиот сообраќај нема да се воведе во периодот на вонредната состојба. Тој додаде дека Железници на РСМ – Транспорт стои на располагање со сите свои ресурси за секоја заинтересирана компанија, колку што може повеќе да го користи овој транспорт.

Со неколку уредби со законска сила донесени од владата се одложува полагањето на испитите за возачи и за превоз на опасни материјали, додека сертификатите се продолжуваат за времетраење на вонредната состојба.