Франција ги укинува хартиените фискални сметки

Во Франција на 1 август стапи одлуката според која издавањето на хартиени фискални сметки станува незадолжително, откако претходно француската влада процени дека секоја година во државата се печатат по 30 милијарди хартиени сметки. 

Потрошувачите сѐ уште ќе можат да побараат хартиени фискални сметки за услугите, а фискалните ќе останат задолжителни во рестораните и јавните паркинзи.

Крајот на системското издавање на хартиени фискални сметки е мерка која француските власти ја воведоа поради зачувување на животната средина, а важи и за сметките издавани од банкоматите. Неколку големи трговци, како на пример „Карфур“, веќе ја применија оваа мерка и престанаа да издаваат сметки во некои од своите продавници уште од април 2021 година. 

Мерката беше критикувана од дел од јавноста, бидејќи многу домаќинства хартиените фискални сметки ги користат за планирање на фамилијарниот буџет.

Сепак, хартиените сметки нема да исчезнат – потрошувачите ќе можат да побараат издавање на фискална сметка за да се расчистат нејаснотии околу цената на некои производи или услуги, а хартиените фискални сметки остануваат задолжителни во рестораните, фризерските салони, хотелите и јавните паркинзи.

Дополнително, француските потрошувачи од почетокот на август се соочија со зголемување на тарифите за електрична енергија за 10 отсто, зголемување кое е предвидено за домаќинствата и малите бизниси, што ја рефлектира желбата на властите да се намали трошокот на јавните финансии.