Голем саем за халал производи ќе се одржи во септември во Сараево

Сараево ќе биде домаќин на најголемиот саем за халал производи во Југоисточна Европа, што ќе се одржи од 26 до 28 септември во сараевскиот центар „Скендерија“. 

Организаторите („Босна Банк Интернешнл“ и „Исламска развојна банка“) очекуваат повеќе од 100 излагачи од регионов и од светот и над 10.000 посетители. 

По презентацијата во Хрватска на можностите што ги нуди саемот, интерес покажаа некои од најголемите хрватски компании, како што се „Краш“, „Гавриловиќ“, „Подравка“, „Виндија“ и други. 

Побарувачката за халал-производи и услуги бележи забрзан раст. Саемот е прилика за производителите, но и за давателите на услуги кои се халал-сертифицирани да се претстават пред дистрибутери и увозници од цел свет, но и пред локалниот пазар кој се повеќе бара производи со халал сертификат, изјави Дино Селимовиќ, директор на маркетинг и комуникации во „Босна банк Интернешнл“, по презентацијата на саемот во Стопанската комора на Хрватска. 

Проценките се дека светскиот халал-пазар брои повеќе од 1,5 милијарди потрошувачи.