„Конзум“ вложи 13 милиони евра за повисоки плати на вработените

„Конзум“ од почетокот на 2022 година ќе ги зголеми платите на околу 9.000 вработени, во што вложи 100 милиони куни (околу 13 милиони евра), соопштија од „Фортенова група“. Трговецот воведува и нов начин на пресметка на платите, во бруто износ, наместо на основа на коефициент. 

На трудот и придонесот на вработените се темелат сите наши деловни успеси. Посебно сум горд што нашите луѓе од година во година се докажуваат како најдобар и најголем малопродажен тим во Хрватска. Верувам дека со новото зголемување на најдобар начин ја искажуваме нашата благодарност за огромната работа што секојдневно се извршува во „КОнзум“, а воедно тоа е најдобар празничен подарок за нашите вработени и за нивните семејства, изјави Зоран Митрески, претседател на Управата на „Конзум“. 

Повисоки плати ќе добијат вработените во малопродажбата, големопродажбата, логистиката и во онлајн продавниците. Во соопштението се вели дека најновиот раст на платите е резултат на квалитетната соработка и договорот со социјалните партнери и „Фортенова група“, во чиј склоп работи и „Конзум“. 

„Конзум“ ги продолжува континуираните настојувања да им обезбеди на работниците уште подобри услови за работа. И во минатите години редовно беа зголемувани платите и надоместоците, се исплаќаат додатоци за Божиќ, за Велигден и регрес, се даваат подароци за новородено дете, јубилејни награди, надоместок за топол оброк и за превоз, награди за особен придонес, слободен ден за родителите на првачиња, дополнително здравствено осигурување и други поволности, соопштија од „Фортенова група“.