Нема полициски час од денеска

Од денеска се укинува полицискиот час во земјата воведен поради коронавирусот пред 66 дена.

Владата вчера на седница донесе одлука и за отворање на угостителските објекти. Рестораните и кафулињата ќе почнат со работа утре, со прецизно утврден протокол за работа во отворените делови, односно на терасите. Работата во затворените делови и во објектите што немаат тераси, ќе се регулира во следната фаза.

Вчерашниот датум (26 мај) коинцидира со датумот кога беше утврден првиот случај на коронавирус во земјава – 26 февруари, точно пред три месеци. Техничкиот премиер Оливер Спасовски предупреди дека тоа не значи оти коронавирусот исчезнал. Тој нагласи дека вирусот ќе биде присутен додека не се стекне имунитет или не биде пронајдена вакцина.

Министерот за здравство Венко Филипче нагласи дека граѓаните мора да ги почитуваат мерките, бидејќи во спротивно, агонијата со вирусот ќе продолжи и по неколку месеци, повторно ќе мора да се воведат рестриктивните мерки.

Владата донесе одлука од 1 јуни да престанат да важат заклучоците со кои различни категории вработени се ослободени по различни основи од редовно и тековно извршување на работните активности, како што се упатување за работа од дома, патување за работа кон градот Скопје, организирање на работниот процес со ротации и други слични мерки и препораки. Оваа одлука на Владата ќе биде придружена со соодветен протокол за работа, дејствување и однесување на работно место, кој се однесува на просторните услови, физичкото растојание во работните и другите простории, носењето лична заштитна опрема и сл.

Тоа не важи за хроничните болни, а отстапка од одлуката се и родителите што имаат деца до 10 години или деца на претшколска возраст, за кои ќе се чека одлуката за отворање на градинките.