Нов „Супер Тинекс“ во Прилеп

Трговскиот синџир „Тинекс“ во саботата го отвори новиот маркет „Супер Тинекс“ во Прилеп.

Новоотворениот маркет е на приземјето на новиот трговскиот центар, лоциран во централното градско подрачје, на пешачката улица Методија Шаторов Шарло бб, спроти влезот на Градскиот пазар.

Станува збор за модерен маркет со 870 м² продажен и 290 м² магацински простор, асортиман од повеќе од 8.000 производи и 5 наплатни каси. Супермаркетот располага и со сопствен паркинг со 38 места, на кој се пристапува од страна на улицата Орде Тутески.

„Супер Тинекс“ е опремен со повеќе различни содржини – модерна пилјара за свежо овошје и зеленчук, месарница, сувомесни и млечни деликатеси, пекарница, оддел за домашно приготвени готови јадења, винотека со голем избор на вина и други пијалаци и уште многу други содржини.

Со отворањето на овој супермаркет во Прилеп беа отворени 32 нови работни места, а бројот на вработени ќе се зголеми по целосното отворање на трговскиот центар, кој е во завршна фаза.

Првиот „Тинекс“ во Прилеп беше отворен пред повеќе од 11 години и сметаме дека за овој долг период, веќе стана дел од градот. Големиот број лојални потрошувачи и долгогодишното постоење на пазарот, постојано нè мотивираат да вложуваме уште повеќе, да отвораме нови маркети во градот, а со тоа и да придонесеме за економијата и трговијата во Прилепскиот Регион, велат од „Тинекс“.

Новиот трговски центар е модерен објект со вкупна површина од 4.300 м², во кој покрај супермаркетот, ќе има и други содржини: ресторан, продавници за облека, менувачница итн. Како што соопштуваат од „Тинекс“, на објектот интензивно се работи за да биде целосно функционален во најкраток период.​