Златко Најдовски: Рекордни постигнувања од постоењето на компанијата

Создавајќи производи по мерка на потрошувачите, „Млекара Битола" ја оправда нивната доверба и на тој начин уште повеќе ја зајакна својата позиција на пазарот. Во следните 2 години ќе се инвестираат околу 5 милиони евра, а планот до 2018 година е да се заокружи цифра на инвестиции од околу 9 милиони евра.

Разговараше: Алма Растодер, alma@instore.mk

Од 2008 година „Млкара" станува дел од „Данубе фудс" и инвестицискиот фонд „Салфорд" и оттогаш постојано се инвестира во зголемување и подобрување на квалитетот на суровото млеко со што оваа година е регистриран 7% пораст во производството на домашно сурово млеко во однос на претходните години. За бројните инвестиции, награди и проекти, како и за идните планови на компанијата зборувавме со генералниот директор на „Млекара Битола", Златко Најдовски.

„Млекара Битола" како млекарница со долгогодишно искуство на македонскиот пазар со години наназад ги следи и строго ги почитува сите стандарди за контрола на квалитетот на производите што се воведуваат на европско ниво. Долга е листата на имплементирани и сертифицирани стандарди. „Млекара Битола" е првата фирма во прехранбениот сектор што уште во 1999 година го сертифицира системот ИСО 9001, во 2002 година доби извозен број за ЕУ како прва фирма во млекарството во регионот, а од 2007 година наваму, сертифицирани и имплементирани се ИСО 22.000, 14.000 и 18.000, а се работи на ИФС и ИСО 26.000. Со ваква листа не може да се пофали ниту една млекарница од регионот. Всушност, тоа го препознаваат купувачите.

Воведувањето на софистицирана технологија во процесот на производство не само што придонесе за подобрување на квалитетот на производите туку во исто време новата технологија создаде можност за проширување на асортиманот и креирање производи што поблиску ги пресретнуваат барањата на потрошувачите. Создавајќи производи по мерка на потрошувачите „Млекара Битола" ја оправда довербата на потрошувачите и на тој начин уште повеќе ја зајакна својата позиција на пазарот. Во следните 2 години ќе се инвестираат околу 5 милиони евра, а планот до 2018 година е да се заокружи цифра од околу 9 милиони евра инвестиција. Со завршувањето на првата фаза сметаме дека ќе бидеме меѓу најдобрите млекарници од Балканот, па сè до Германија.

Недостигот од квалитетно сурово млеко на пазарот не е новина. Тој проблем се провлекува со години. Особено во сезоните кога постои поголем дефицит на домашно млеко, може да се премине кон увоз на висококвалитетно евапорирано млеко, пред сè, поради сезонските варијации во млекопроизводството и отежнатата набавка на домашна суровина. Во интерес на зголемување на домашното производство почнавме со проектот на увоз на високостелни јуници од ЕУ. Во минатите две години увезовме над 800 грла. Проектот ќе продолжи и во следните две години, со што се очекува во иднина да се надмине дефицитот на квалитетно домашно млеко.

Инвестирате во едукација на фармерите и со т.н. инсталирање на „ладен синџир" за откуп на сурово ладено млеко, со цел подобрување на квалитетот на млекото. Колку овие едукации реално го подобрија квалитетот и дали го зголемија локалниот откуп на млеко?

Да, може да се каже дека проектот за едукација на фармерите и инсталирањето на опремата (200 лактофризери) што овозможува откуп на ладено сурово млеко даде одлични резултати. Паралелно со увозот на квалитетни грла се работи во континуитет на зголемување на млекопродукцијата по грло преку современи програми. Секоја година имаме ангажман на холандски фармери кои ги пренесуваат своите искуства кај фармерите. На овој начин се зголеми количеството на сурово млеко од домашни производители чијшто квалитет е прифатлив за да може тоа сурово млеко да се прими како суровина во процесот на производство на производите на „Млекара Битола". Само за оваа година е регистриран 7% пораст во производството на домашно сурово млеко во однос на претходните години.

Прочитајте повеќе во електронското и печатеното издание на InStore бр.10