Ќе се преполови производството на банани

Производителите на банани од Филипините предупредуваат дека извозот на ова овошје во светот оваа година би можел да се намали за 40% поради ограничување на движењето предизвикано од пандемијата со корона. 

Извозот на банани од Филипините се очекува да се намали на 2,5 милиони тони оваа година, во однос на четири милиони минатата година, вели Стефен Антиг, извршен директор на асоцијацијата на производители и извозници на банани на Филипините. 

Бананите скапуваат затоа што поради полицискиот час во многу држави, производителите не можат да ги берат секој ден.

Филипините сочинуваат околу 20% од глобалната мрежа за снабдување со ова овошје и околу 90% од вкупниот извоз на банани во Азија. Главниот остров на Филипините, Лузон е под карантин од средината март, а така ќе остане до крајот на овој месец. Провинциите во јужниот дел на Филипините, каде има многу плантажи со банани, исто така имаат воведено рестриктивни мерки за да се спречи ширење на коронавирусот.