Андреј Беле во управувачкиот тим на „Станиќ“

Андреј Беле му се придружи на Зоран Мабиќ на чело на компанијата „Станиќ бевериџис“.

Поради динамичниот развој на работењето на групацијата „Станиќ“, планираните аквизиции и стратешките планови, на чело на управувачкиот тим на „Станиќ бевериџис“ доаѓа Андреј Беле, се наведува во соопштението на хрватската компанија.

Беле (лево на фотографијата) ќе ја извршува функцијата претседател на Управниот одбор на „Станиќ бевериџис“, односно, заедно со  Зоран Мабиќ (десно на фотографијата), ќе биде одговорен за целокупната производствена програма. Мабиќ е нов заменик претседател на Управниот одбор и е одговорен за дистрибуцијата и продажбата.

Во „Станиќ бевериџис“, Беле доаѓа од позицијата генерален директор на стратешката единица кафе во „Атлантик група“. Во својата богата деловна кариера, тој работел во неколку водечки компании од прехранбената индустрија, како што се „Дрога Колинска“ и „Жито“, како и во хотелската компанија „Рогашка Слатина“.

Со знаењето, искуството, експертизата и високата мотивираност, веруваме дека Беле многу ќе придонесе за понатамошно унапредување на стратешкото работење, соопштуваат од групацијата „Станиќ“.