Анализи

Минтел: Што сакаат потрошувачите и зошто?

09 сеп 2022

Како што полека се расплетува пандемијата на ковид-19, која влијаеше врз речиси секоја индустрија низ целиот свет, тимот на експерти од „Минтел“ анализира како тоа ќе се одрази на пазарите и како ќе се одвиваат промените.

Извор: „Минтел“

Анализата на трендовите и прогнозите се засноваат врз економски, демографски, технолошки, политички и социолошки збирки на податоци. Притоа, се анализира влијанието што внатрешните и надворешните промени во животната средина го имаат врз мотивацијата и изборот на потрошувачите, како и однесувањето што произлегува од тоа.

  1.  ПОД КОНТРОЛА

Во време на неизвесност, потрошувачите сакаат да имаат контрола врз нивниот живот. За брендовите е неопходно да бидат во можност да достават информации и опции што им се потребни на потрошувачите за да се чувствуваат дека управуваат со контролата.

Чувствата на неизвесност и финансиска несигурност, создадени и засилени за време на пандемијата, ги поттикнуваат потрошувачите да настојуваат да ја задржат контролата во сопствени раце. Но, истовремено, континуираното ширење на дезинформации им отежнува да носат информирани одлуки.

Затоа, на потрошувачите им е потребна едноставност, транспарентност, флексибилност и опции за донесување одлуки што одговараат на нивните индивидуални променливи потреби и околности. Тие сакаат да знаат сè за состојките на производите – и за тие што се во составот и за тие што не се, и зошто. Сепак, истовремено сакаат да бидат уверени и во ефикасноста за да бидат сигурни дека производите го исполнуваат тоа што го ветуваат.

Трендот сега

Технологијата ги олеснува методите на верификација и следење, кои создаваат чувство на контрола кај потрошувачите. Тоа можат да бидат, на пример, QR-кодови на пакувањето или уреди за носење што обезбедуваат лични здравствени информации. Додека повеќе брендови им припишуваат функционални предности на своите производи, тоа може да резултира со огромна листа со состојки. За да се ублажи тој ефект, едноставното пакување ќе помогне да се пренесе автентичноста. Индивидуализираните производи со персонализирани карактеристики што се формулирани врз основа на податоците за потрошувачите ќе имаат голема предност кај луѓето што внимаваат на тоа што го консумираат.

Понатаму, финансиската несигурност води кон иновации и во банкарството, при што апликациите обезбедуваат поедноставни и попристапни начини за контрола врз парите. На тој начин, луѓето имаат помала причина физички да посетуваат банка во неповолни моменти, а притоа имаат и поголемо чувство на контрола. За дополнително да се здобијат со моќ над сопствените животи, паметните уреди и апарати им нудат на потрошувачите зголемено чувство на контрола, бидејќи тие во секое време може да ги проверат своите домови, домашни миленици или дури и членови на семејството.

Трендот во иднина

Чувството на несигурност ќе продолжи да ги поттикнува потрошувачите да сакаат да ја имаат контролата. Дезинформациите ќе останат предизвик, со тоа што софтверите и технологиите ќе стануваат сè пософистицирани (на пример, дипфејк). Тоа ќе создава недоверба и проверката на фактите ќе ја прави уште потешка и поважна. Брендовите ќе треба да работат понапорно за да им дадат доверливи информации на потрошувачите и да ги балансираат цензурата и автентичноста.

Трката за најбрза испорака ќе се развива и ќе се фокусира на флексибилноста, овозможувајќи им на потрошувачите поголема контрола врз тоа кога пристигнуваат производите, колку се вклопуваат во нивните распореди и дали одговараат на нивните други специфични потреби.

Желбата на потрошувачите да ги дознаат потенцијалните исходи ќе се манифестира во развојот на предиктивните технологии, кои ќе можат да предвидат негативни настани. Од болести и веројатни датуми на смрт, до развој на емотивните врски, технологијата ќе се развива за да им овозможи на потрошувачите да планираат спокојно.

Освен тоа, материјалите против временски непогоди ќе станат сè позастапени во изградбата на домови и згради, а ќе има и пораст на изградбата на подземни станови за поголема безбедност. Напредните алгоритми ќе можат да ги следат расположенијата и карактерот на потрошувачите за прецизно да им покажат колкава е веројатноста да уживаат во одреден ресторан или дестинација за патување.

Можности за брендовите

  • Станува сè поважно да се разберат синџирите на снабдување и што тие значат во етички контекст. Брендовите треба да ја имаат предвид технологијата што ги следи синџирите на снабдување во реално време и да добијат потврда од независни и специјализирани тела.
  • Потрошувачите се свесни за нивниот дигитален отпечаток, што предизвикува загриженост за тоа кој има пристап до нивните податоци и како тие се користат. Брендовите треба да одговорат на тоа преку едноставни и јасни опции за „откажување“, кои овозможуваат контрола на приватноста.
  • Лажните вести ја зголемуваат вредноста на вистината, а тврдењата што може да се докажат се непроценливо богатство за брендовите. Јасните и едноставни пораки на брендовите поттикнуваат чувство на доверба и може да помогнат да се избегнат обвинувањата за неавтентичност.
  • Брендовите што нудат приспособливи производи, како и тие што експериментираат и ги следат променливите потреби, се одличен показател за потрошувачите дека артиклите што ги купуваат и користат ќе им служат.
  1. УЖИВАЊЕ НАСЕКАДЕ

Откако го поминаа карантинот, потрошувачите се желни да излезат од сопствените граници и да истражуваат, да прифатат нови искуства и виртуелно и во „вистинскиот“ физички свет.

Потрошувачите бараат извори на радост како противтежа на пандемијата и другите континуирани локални и глобални кризи (од политички немири до закани за животната средина), кои им предизвикуваат вознемиреност и стрес. По пандемијата, голем дел од луѓето се соочија со синдромот „вина на преживеаниот“. Затоа, особено е важно тие да си дозволат да почувствуваат радост и уживање, кои им се многу потребни.

Дигиталната технологија стана вообичаен начин за забава, но потрошувачите бараат забава и разиграност во сите области од животот. Тие имаат ново чувство на благодарност за малите секојдневни работи и уживањето во моментот.

Трендот сега

Брендовите ја препознаваат важноста за подигнување на расположението на луѓето во време на несигурност и улогата што можат да ја имаат во овој процес. Во следниот период брендовите ќе ги истакнуваат добрите вести и ќе ја нагласуваат позитивната страна, овозможувајќи им на потрошувачите да се одморат од несреќата и темнината.

Нудејќи забава и разиграност преку дигитална забава или преку лично искуство, брендовите ќе им овозможуваат на потрошувачите да чувствуваат радост додека закрепнуваат од пандемијата. Потрошувачите ќе продолжат да се потпираат на брендовите за да побегнат од секојдневните грижи, стресови и од здодевноста.

Освен што ќе понудат нови искуства, брендовите ќе ги охрабруваат потрошувачите да си играат и да се забавуваат со секојдневните рутини, односно да експериментираат со модата, убавината, храната и готвењето.

Трендот во иднина

Потрошувачите ќе продолжат да трагаат по уживање и по разиграност во сите аспекти од животот за да се оддалечат од монотонијата и од секојдневните грижи. Стресот предизвикан од пандемијата можеби повеќе не е централен за потребата на потрошувачите за забава и за бегство, но сепак, екоанксиозноста ќе се влошува. Сè позафатениот начин на живот ќе продолжи да врши притисок врз потрошувачите.

Гејмификацијата ќе се развива, а разиграноста ќе биде во центарот на тоа како луѓето ќе се релаксираат, учат, работат и се грижат за сопственото здравје. Интеракциите со брендови, преку различни кампањи и апликации, сè повеќе ќе бидат со елементи на гејмификација.

Слично на тоа, и искуствата во малопродажба ќе го зголемат ангажманот на потрошувачите и „играта“ со производите. Потрошувачите не бараат од брендовите само да им продаваат производи, туку и да им понудат чувство на уживање.

Сепак, ќе се појави и одреден притисок врз гејмификацијата и моменталното задоволство што го нуди, како и врз распространетоста на дигиталната забава. Оваа тенденција ќе се појави поради тоа што потрошувачите сега имаат повнимателен пристап кон задоволството и уживањето, односно многумина повеќе ја бараат среќата внатрешно отколку надворешно.

Можности за брендовите

  • Брендовите треба да го истакнат позитивното во нивните пораки за да го подигнат расположението на потрошувачите во овој период на несигурност и да им помогнат да не се чувствуваат преплавени со негативни вести.
  • Имајќи ја предвид зголемената желба на потрошувачите за забава и за нешто ново, брендовите треба да обезбедат забавни искуства, без разлика дали тие ќе бидат во форма на нова храна, активност или настан.
  • Брендовите треба да размислат и да додадат елементи на гејмификација во кампањите преку дигитални и физички услуги во продавницата, со што ќе ги разиграат интеракциите со потрошувачите.
  • Потрошувачите треба да имаат можност да истражуваат во продавницата, а трговците треба да им го обезбедат тоа со понуда што ги трансформира секојдневните рутини и задачи во забавни активности.
  1. ЕТИЧКА ПРОВЕРКА

Додека многу брендови го кренаа гласот за контроверзни теми, потрошувачите сакаат да видат мерлив напредок во однос на нивните цели.

Побарувачката на потрошувачите и очекувањата за етичките заложби на брендовите постојано се развиваат. Потрошувачите повеќе не очекуваат брендовите да бидат само „етички“, туку бараат да видат и мерливи, транспарентни и конзистентни активности од брендовите што избрале да ги поддржат. Брендовите треба да осигурат дека не само што треба да ги земаат предвид етичките практики, туку и дека тие се фиксна карактеристика на нивниот бизнис-модел и на долгорочните стратегии.

Трендот сега

Потрошувачите имаат помала доверба од кога било досега кон компаниите, владите и кон институциите. Оттука, помала е и веројатноста да им веруваат на брендовите кога тие велат дека ја прават вистинската работа. Како компаниите можат да им докажат на потрошувачите дека етиката е суштински дел од начинот на кој работат и да ја добијат нивната доверба?

Со растечката загриженост за низа прашања – од безбедноста на храната и етичките извори, до безбедноста на податоците и пристрасноста на алгоритмите, потрошувачите сакаат да знаат повеќе за производите и за брендовите што ги купуваат. Покрај истакнувањето на достигнувањата и силните страни, бизнисите треба да бидат транспарентни и за нивните слабости, односно за тоа каде и зошто не успеваат и како планираат да ги решат тие прашања.

Трендот во иднина

Целосната транспарентност не значи по дифолт дека потрошувачите ќе можат да го разберат влијанието на брендот, влијанието што тие го имаат со изборот или дали брендот напредува во наведените цели.

Затоа е клучно да се користи метрика која точно ги одразува проблемите што брендовите се обидуваат да ги решат. Ако компанијата не го мери правилно тоа што сака да го поправи или промени, тешко е да се одреди дали е постигнат напредок, а камоли да се пренесе тоа на начин на кој потрошувачите ќе го разберат. Анализата на метриката ги принудува компаниите да останат одговорни за своите постапки, а на крајот на краиштата, одговорноста е тоа што го бараат потрошувачите.

Исто така, постои простор и за понатамошна стандардизација на етичкото однесување во индустријата, како што е, на пример, употребата на логоа за фер трговија. На тој начин потрошувачите ќе можат полесно да ги донесат своите етички одлуки при купувањето.

Можности за брендовите

  • Со користење метрика за демонстрација на сопствените етички напори, брендовите можат да им помогнат на потрошувачите да го измерат влијанието врз тоа што го постигнале и да ги насочат одлуките за купување.
  • Етичките стандарди може да бидат различни за различни индустрии. Потребно е да се бара поддршка или да се соработува со специјализирани организации што ќе можат да дадат подетални насоки.
  • Вклучувањето етичари во извршните одбори и поврзувањето на платите на извршните директори со етичките цели се примери за начините на кои компаниите и брендовите можат да се осигурат дека развојните стратегии не се во спротивност со очекувањата на јавноста.
  • Брендовите треба да бидат транспарентни во врска со цените, односно како „вистинските трошоци“ се рефлектираат во структурата на цените на производот. Ако повисоката цена значи подобар и етички покоректен производ, тогаш брендовите треба да објаснат за што ќе бидат наменети повисоките трошоци.

„Минтел“ детектира уште два дополнителни потрошувачки трендови, кои ќе имаат значително влијание врз глобалните потрошувачки пазари во следните неколку години. Првиот од нив се флексибилните простори, што значи дека јавните и приватните простори мора да ги максимираат можностите што ги нудат за да одговараат на флексибилниот начин на живот на потрошувачите. Сега, повеќе од кога било, брендовите треба да инспирираат наместо да препишуваат. Потрошувачите го реосмислуваат просторот во кој живеат и се во потрага по брендови што го редизајнираат светот околу нив. Вториот тренд е климатската сложеност, односно потрагата на потрошувачите по брендови кои ќе им помогнат да го ублажат нивното влијание врз животната средина. Компаниите што не се менуваат проактивно во пресрет на климатската криза ќе бидат принудени да се променат поради неа. Брендовите имаат можност да соработуваат со потрошувачите за да им помогнат да направат избор што е во согласност со нивните климатски цели.



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...